Хитай даирилири торда “қанунсиз учур тарқитиш” җинайитидин 10 делони елан қилди

Йеқинда хитай даирилири уйғур елидики аһалиләрниң әқлийфон, хатирә компютери, айпәд вә башқа електронлуқ алақә үскүнилирини өзлири турушлуқ райондики сақчиханиларға елип берип тәкшүрүштин өткүзүшни тәләп қилған иди.

Һалбуки, аридин бир һәптә өтмәйла уйғур аптоном районлуқ интернет-учур ишханиси “қанунсиз учур тарқатқан” 10 делони елан қилип, аһалиләрни қаттиқ агаһландурған.

Хәвәрдә дейилишичә, мәзкур 10 дело интернеттин пайдилинип террорлуқ, зораванлиқ, диний әсәбийлик вә миллий бөлгүнчиликкә даир “қанунсиз учур” ларни тарқатқан кишиләрниң делоси икән.

Мәзкур 10 делониң ичидә 4 нәпәр уйғур гумандар “террорлуқ вә диний әсәбийлик” кә даир учур тарқатқанлиқи, 4 нәпәр хитай гумандар “өсәк сөз тарқитип қутратқулуқ қилғанлиқи” 1 нәпәр моңғул гумандар торда “миллий өчмәнлик” ни тәрғиб қилғанлиқи, 1 нәпәр қазақ гумандар үндидарда һөкүмәтниң тәшвиқатиға қарши сөз қилғанлиқи үчүн тутулған икән.

Хәвәрдә юқириқи 10 дело алаһидә пәш қилинип, тордин пайдилинип “қанунсиз учур” тарқитишқа урунғанларниң қаттиқ җазалинидиғанлиқи агаһландурулған.

Көзәткүчиләр, нөвәттә уйғур дияридики тор қамилиниң адәттин ташқири күчәйтилгәнликини, үндидар топиға чәтәлләрдин қошулған әзаларниң бирдәк өчүрүлүватқанлиқини илгири сүрмәктә.