Американиң «қара тизимлики» гә елинған ширкәтләр америкиға наразилиқ билдүргән

Мухбиримиз әркин
2020-05-25
Елхәт
Пикир
Share
Принт

Америка сода министирлиқи өткән җүмә күни хитайниң 33 ширкитини дөләт бихәтәрлики вә уйғур районида кишилик һоқуққа хилаплиқ қилиши сәвәблик «қара тизимлик» кә алғанлиқини елан қилғаниди.

«Җәнубий хитай сәһәр почтиси» гезитиниң 25-май хәвәр қилишичә, қара тизимликтики ширкәтләр америка сода министирлиқиниң қарариға наразилиқ билдүргән шундақла хитайниң «йәршари вақти» гезити хитайниң америкаға қарши өч елиш тәдбири қоллиниши мумкинликини билдүргән. Америка сода министирлиқи 22-май күни қара тизимликкә алған 33 ширкәтниң 9и уйғур районида кишилик һоқуқни дәпсәндә қилишқа четишлиқ, дәп әйибләнгән.

Тизимликтики бу ширкәтләр хитай җамаәт хәвпсизлик министирлиқиниң қанун дохтурлуқ тәтқиқат институти, ақсу хуафу тоқумичилиқ ширкити, клодволк технологийә ширкити, файберхом технологийә гуруһи, нәнҗиң файберхом алақә тәрәққият ширкити вә нетпоса қатарлиқ 8 ширкәт, бир дөләт аппаратини өз ичигә алғаниди. «Җәнубий хитай сәһәр почтиси» ниң билдүрүшичә, тизимликтики бәзи ширкәтләр баянат елан қилип, америка сода министирлиқиниң қарарини тәнқидлигән. Хитайниң клодволк технологийә ширкити 24-май елан қилған баянатида, «америка дөләт қоралини ишлитип, базар қаидисини қалаймиқанлаштурди. Бу, америка ширкәтлири вә йәршари тәрәққиятиға зиянлиқ болған юқири сүпәтлик байлиқ тәқсиматиға пайдисиз» дегән.

Лекин бу ширкәт һөкүмәткә һәмкарлишип, кишилик һоқуқни дәпсәндә қилишниң хәлқара базар қаидисигә хилап икәнлики һәққидә һечнемә демигән. Америка сода министирлиқиниң 22-май елан қилған баянатида, юқириқи 9 ширкәт вә органниң уйғур аптоном районидики йәрлик милләтләргә қарши елип берилған «бастуруш, зор көләмлик тутқун, мәҗбурий әмгәк, юқири техникилиқ тәқибләшләрдә садир болған кишилик һоқуқ дәпсәндичиликлиригә шерик болғанлиқи» тәкитлигәниди.

Пикирләр (0)
Share
Толуқ бәт