Amérikaning "Qara tizimliki" ge élin'ghan shirketler amérikigha naraziliq bildürgen

Muxbirimiz erkin
2020-05-25
Élxet
Pikir
Share
Print

Amérika soda ministirliqi ötken jüme küni xitayning 33 shirkitini dölet bixeterliki we Uyghur rayonida kishilik hoquqqa xilapliq qilishi seweblik "Qara tizimlik" ke alghanliqini élan qilghanidi.

"Jenubiy xitay seher pochtisi" gézitining 25-may xewer qilishiche, qara tizimliktiki shirketler amérika soda ministirliqining qararigha naraziliq bildürgen shundaqla xitayning "Yershari waqti" géziti xitayning amérikagha qarshi öch élish tedbiri qollinishi mumkinlikini bildürgen. Amérika soda ministirliqi 22-may küni qara tizimlikke alghan 33 shirketning 9i Uyghur rayonida kishilik hoquqni depsende qilishqa chétishliq, dep eyiblen'gen.

Tizimliktiki bu shirketler xitay jama'et xewpsizlik ministirliqining qanun doxturluq tetqiqat instituti, aqsu xu'afu toqumichiliq shirkiti, klodwolk téxnologiye shirkiti, faybérxom téxnologiye guruhi, nenjing faybérxom alaqe tereqqiyat shirkiti we nétposa qatarliq 8 shirket, bir dölet apparatini öz ichige alghanidi. "Jenubiy xitay seher pochtisi" ning bildürüshiche, tizimliktiki bezi shirketler bayanat élan qilip, amérika soda ministirliqining qararini tenqidligen. Xitayning klodwolk téxnologiye shirkiti 24-may élan qilghan bayanatida, "Amérika dölet qoralini ishlitip, bazar qa'idisini qalaymiqanlashturdi. Bu, amérika shirketliri we yershari tereqqiyatigha ziyanliq bolghan yuqiri süpetlik bayliq teqsimatigha paydisiz" dégen.

Lékin bu shirket hökümetke hemkarliship, kishilik hoquqni depsende qilishning xelq'ara bazar qa'idisige xilap ikenliki heqqide héchnéme démigen. Amérika soda ministirliqining 22-may élan qilghan bayanatida, yuqiriqi 9 shirket we organning Uyghur aptonom rayonidiki yerlik milletlerge qarshi élip bérilghan "Basturush, zor kölemlik tutqun, mejburiy emgek, yuqiri téxnikiliq teqibleshlerde sadir bolghan kishilik hoquq depsendichiliklirige shérik bolghanliqi" tekitligenidi.

Toluq bet