Qaramay-chöchek tömür yolida pat yéqinda qatnash bashlinidiken

Muxbirimiz erkin
2019-05-24
Élxet
Pikir
Share
Print

Xitay hökümiti 5 milyard 200 milyon yüen meblegh sélip yasighan qaramay-chöchek tömür yolida 5‏-ayning 30‏-künidin bashlap resmiy qatnash bashlinidiken. Eger mezkur tömür yolda resmiy qatnash baslansa Uyghur aptonom rayonida tömür yol barmighan héchqandaq wilayet merkizi qalmaydu.

Xitay hökümet taratqulirining xewer qilishiche, 271 kilométir uzunluqtiki mezkur tömür yolning qaramaydin chöchekkiche bolghan ariliqigha 3 béket qurulghan. Qaramay-chöchek tömür yol qurulushida 2014‏-yili ish bashlan'ghan bolup, esli 2016‏-yilining axirlirida qurulushning asasi qismi pütüp bolushi, 2017‏-yili 6 ‏-ayda pütün qurulush tamamlinishi kérek idi. Lékin, qurulushning kéchikip, uningda emdi qatnash bashlinishining sewebi melum emes.

Xitay taratqulirida qurulushning kéchikish sewebige héchqandaq chüshenche bérilmigen. Mezkur tömür yol qurulushi xitay hökümiti Uyghur, qazaq, qirghiz qatarliq yerlik milletlerni keng ölemlik tutqun qilip, ularni yighiwélish lagérlirigha qamighan, shuningdek pütün rayonda digital nazaret sistémisi qurup, Uyghurlarni omumyüzlük teqib astigha alghan bir mezgilde tamamlan'ghan.

Xitay hökümiti ötken yili yighiwélish lagérliridiki minglighan Uyghurni xitayning ichkiri ölkiliridiki türmilerge yötkeshte törmür yolgha tayan'ghan. Radiyomiz, da'irilerning Uyghur tutqunlirini tömür yol arqiliq gensu, chingxey, shenshi, ichki mongghul, xéylongjyang, xénen qatarliq ölkilerdiki türmilerge yötkigenlikini delilligenidi.

Melum bolushiche, qaramay-chöchek tömür yoli tarbaghatayning toli, dörbiljin nahiyeliridin ötüp chöchekke baridiken. "Shinjang géziti" ning xewiride neqil keltürülüshiche, tarbaghatay wilayetlik tereqqiyat-islahat komitétining mu'awin mudiri malin mezkur tömür yol "Shinjangning ichi we sirtidiki méhmanlarning chöchekke kélip ziyaret, sayahet we soda qilishigha qulayliq yaritipla qalmay, chöchekning mol kan bayliqini sirtqa yötkeshtiki altun yol" ikenlikini tekitligen.

Toluq bet