Лагерлар билән тонулған қарамай шәһири хитайниң «сиясий-қанун билән башқуруштики үлгилик шәһәр» лириниң бири болуп баһаланған

Мухбиримиз әркин
2020-08-21
Елхәт
Пикир
Share
Принт

Хитайниң 2017-йили башланған чоң тутқунида лагерлар билән тонулған қарамай шәһири хитайниң сиясий-қанун билән башқуруштики үлгилик шәһәрлириниң бири болуп баһаланған.

Шинхуа агентлиқиниң 21-авғуст хәвәр қилишчиһә, қарамай шәһири бу саһәдә уйғур аптоном районидин хитайниң «мәмликәтлик үлгилик шәһәр» тизимликигә киргән бирдин-бир шәһәр икән. Хитайниң чоң тутқунида қарамайда нурғун лагерларниң қурулғанлиқи, бу лагерларниң бәзилириниң йәр астиға җайлашқанлиқи илгири сүрүлгән иди.

Нөвәттә голландийәдә яшаватқан лагер шаһити вә паалийәтчи өмер бәкали қарамайдики бир лагерға қамалған тутқунларниң бири болуп, униң гуваһлиқи кишиләрниң бу җайдики лагерлар вә униңдики тутқунларниң әһвалиға болған диққитини қозғиған иди. Шинхуа агентлиқиниң хәвиридә тәкитлишичә, қарамай шәһири «йеқинқи йилларда қанун билән һөкүмәт башқуруш қурулушиға әһмийәт бәргәнлики, қанун билән һөкүмәт қуруштики түрлүк вәзипиләрни диққәт билән орундап, көрүнәрлик нәтиҗигә еришкәнлики» үчүн хитайниң «мәркизий омумйүзлүк қанун билән идарә қилиш комитети» тәрипидин буниңға лайиқ көрүлгән икән.

Бу хитай даирилириниң тунҗи қетим «қанун билән башқуруштики үлгилик шәһәр» ләрни баһалишидур. Нөвәттә қарамайдики лагерларға қамалған тутқунларниң қандақ бир тәрәп қилинғанлиқи ениқ әмәс. Көзәткүчиләрниң илгири сүрүшичә, хитай һөкүмити 2017-йили тутулған тутқунларниң бир қисмини қамаққа һөкүм қилип, бир қисмини карханиларға йөткигән, аз бир қисмини қоюп берип, аилисидә назарәткә алған болсиму, лекин қалғанларниң ақивити һазирғичә мәлум әмәс.

Пикирләр (0)
Share
Толуқ бәт