Lagérlar bilen tonulghan qaramay shehiri xitayning "Siyasiy-qanun bilen bashqurushtiki ülgilik sheher" lirining biri bolup bahalan'ghan

Muxbirimiz erkin
2020-08-21
Élxet
Pikir
Share
Print

Xitayning 2017-yili bashlan'ghan chong tutqunida lagérlar bilen tonulghan qaramay shehiri xitayning siyasiy-qanun bilen bashqurushtiki ülgilik sheherlirining biri bolup bahalan'ghan.

Shinxu'a agéntliqining 21-awghust xewer qilishchihe, qaramay shehiri bu sahede Uyghur aptonom rayonidin xitayning "Memliketlik ülgilik sheher" tizimlikige kirgen birdin-bir sheher iken. Xitayning chong tutqunida qaramayda nurghun lagérlarning qurulghanliqi, bu lagérlarning bezilirining yer astigha jaylashqanliqi ilgiri sürülgen idi.

Nöwette gollandiyede yashawatqan lagér shahiti we pa'aliyetchi ömér bek'ali qaramaydiki bir lagérgha qamalghan tutqunlarning biri bolup, uning guwahliqi kishilerning bu jaydiki lagérlar we uningdiki tutqunlarning ehwaligha bolghan diqqitini qozghighan idi. Shinxu'a agéntliqining xewiride tekitlishiche, qaramay shehiri "Yéqinqi yillarda qanun bilen hökümet bashqurush qurulushigha ehmiyet bergenliki, qanun bilen hökümet qurushtiki türlük wezipilerni diqqet bilen orundap, körünerlik netijige érishkenliki" üchün xitayning "Merkiziy omumyüzlük qanun bilen idare qilish komitéti" teripidin buninggha layiq körülgen iken.

Bu xitay da'irilirining tunji qétim "Qanun bilen bashqurushtiki ülgilik sheher" lerni bahalishidur. Nöwette qaramaydiki lagérlargha qamalghan tutqunlarning qandaq bir terep qilin'ghanliqi éniq emes. Közetküchilerning ilgiri sürüshiche, xitay hökümiti 2017-yili tutulghan tutqunlarning bir qismini qamaqqa höküm qilip, bir qismini karxanilargha yötkigen, az bir qismini qoyup bérip, a'iliside nazaretke alghan bolsimu, lékin qalghanlarning aqiwiti hazirghiche melum emes.

Toluq bet