Хитай һөкүмити ата-анилири «лагерларға» қамалған уйғур балилирини қаттиқ назарәт астида тутмақта икән

Мухбиримиз әркин
2018-10-01
Елхәт
Пикир
Share
Принт

Хәлқара кишилик һоқуқ тәшкилатлири хитай даирилириниң ата -аниси йиғивелиш лагерлириға қамилип қаранчуқсиз қалған уйғур балилирини қаттиқ назарәт астида тутуватқанлиқини билдүрди.

«Зимистан» ториниң хәвәр қилишичә, нөвәттә хотәнниң лоп наһийәсидә ата-аниси йиғивелиш лагериға әкетилип, қаранчуқсиз қалған 2000 дәк бала болуп, йәрлик даириләр бу балиларни қаттиқ назарәт астида тутуп турмақта икән.

Хәвәрдә, ата-аниси тутқун қилинип балилири назарәт астиға елинған бундақ аилиләр «қошмақ тутқун аилиләр» дәп атилидиғанлиқи билдүрүлгән.

Хәвәрдә йәрлик даириләрниң нәқил кәлтүрүшичә, нөвәттә лоп наһийәсидики бәзи мәктәпләр «қошмақ тутқун аилиләр» ниң пәрзәнтлирини тәрбийәләп, уларни «хитайлаштуридиған» ятақлиқ мәркәзләргә өзгәртилгән.

Хәвәрдә, лоп наһийәсидики «шинхуа меһри-шәпқәт йәслиси» ниң мана шундақ мәктәпләрниң бири икәнлики, бу орунда 1 яштин 3 яшқичә болған 150 дин артуқ уйғур балиниң тәрбийәлиниватқанлиқи илгири сүрүлгән.

Хәвәрдә баян қилинишичә, бу наһийәдики «йүду меһри-шәпқәт мәктипи» дә 3 яштин 6 яшқичә болған 500 дин артуқ бала бар икән. Хәвәрдә йәнә бу мәктәпләрниң сиртқа пүтүнләй тақақ икәнлики, униң там, ишик вә дәрвазилириниң түрмигә охшаш сим тосуқлар билән торалғанлиқи, балиларниң сиртқа чиқиши чәклинидиғанлиқи билдүрүлгән.

Хәвәрдә ашкарилинишичә, балилар һәр айда аран бир қетим ата-аниси билән видейо арқилиқ көрүштүрүлидиған болуп, балилар һәр қетим ата-аниси көргәндә уларни сеғинип йиға-зарә қилишидикән.

Кишилик һоқуқ тәшкилатлириниң илгири сүрүшичә, нөвәттә бир милйондәк уйғур йиғивелиш лагерлириға қамалған болуп, икки милйондәк киши очуқ тәрбийәләш мәркәзлиридә өгинишкә қатнашмақта икән.

Йеқинда радийомизға кәлгән учурларда хитай даирилириниң лагерларда кәң көләмлик сот ечип, тутқунларға түркүм- түркүмләп җаза һөкүми елан қиливатқанлиқи, кесилгәнләрни пойиз арқилиқ ичкири өлкиләргә йөткәватқанлиқи илгири сүрүлгән иди.

Радийомиз өткән һәптә қәшқәрдики бир лагердин 2000 дәк уйғурниң пойиз арқилиқ ичкиригә йөткәп кетилгәнликини дәлиллигән иди.

Пикирләр (0)
Share
Толуқ бәт