Қарақаш наһийәсидә байрақ чиқиришқа 3 қетим қатнашмиғанларниң лагерға йоллинидиғанлиқи ашкариланди

Мухбиримиз әркин
2019-10-21
Елхәт
Пикир
Share
Принт

21‏-Өктәбир, қарақаш наһийәсиниң байрақ чиқиришни бирликкә кәлтүрүш, өлчәмләштүрүш вә қаидиләштүрүш тоғрисидики һөҗҗити чәтәлдики иҗтимаий таратқуларда тарқилип, көзәткүчиләрниң алаһидә диққитини қозғиди.

Һөҗәттә көрситилишичә, әгәр һәрқандақ бир пуқра өзи турушлуқ кәнтниң байрақ чиқириш мурасимиға 3 қетим яки униңдин артуқ сәвәбсиз қатнашмиса лагерға елип кетилидикән. Мәзкур һөҗҗәттә, һәр қетимлиқ байрақ чиқириш мурасимини қандақ өткүзүш, қандақ башқуруш, пуқраларға қандақ тәләпләрни қоюш, һәр қетимлиқ байрақ чиқиришта кимлик тәкшүрүш қатарлиқ әһваллар тәпсилий чүшәндүрүлгән. Һөҗҗәттә қәйт қилинишичә, байрақ чиқиришқа 3 қетим яки униңдин артуқ қатнашмиғанлар лагерға елип кетилгән сирт, 2 қетим сәвәбсиз қатнашмиғанлар кәчлик сиясий өгинишкә йоллинидикән, бир қетим сәвәбсиз қатнашмиғанлар болса кәнт аманлиқ мудири тәрипидин чақиртилип, «тәрбийә» берилидикән.

Һөҗҗәттә, «өз өзини тәкшүрүш, арилап тәкшүрүш вә назарәт қилиш шәклини бирләштүрүш арқилиқ асаси қатлам партийә тәшкилатлириниң байрақ чиқириш мурасимини омумйүзлүк игиләп туруши ишқа ашурулғанлиқи», кәнт вә иҗтимаий районлардики амминиң мурасимға қатнишиш нисбити 90 % тин ашқанлиқи тәкитләнгән.

Хитай һөкүмити йеқинқи йилларда һәр дүшәнбә күни әтигәндә байрақ чиқириш мурасими өткүзүшни йолға қоюп, мәзкур паалийәтни һәр бир уйғурниң мәвқәсини синайдиған бир сиясий өлчәмгә айландурған. Лекин бу бәлгилимә уйғур кишилик һоқуқ тәшкилатлириниң қаттиқ тәнқидигә учрап кәлгән. Улар, бу мурасимниң «уйғурларға қилиниватқан сиясий вә писхлогийәлик бесим» икәнлики вә кәнт хәлқиниң турмушиға зор қулайсизлиқларни яритип беривтақанлиқини тәкитләп кәлгәниди. Һөҗәттә көрситилишичә, нөвәттә қарақаш наһийәсигә қарашлиқ 3384 кәнт вә иҗтимаий районларда бир туташ тәкшүрүш ишики вә кимлик тонуш системиси қурулуп, 7 кишилик байрақ қоғдаш әтрити тәсис қилинған. Һәр бир кәнттики пуқралар гуруппиларға бөлүнгән болуп, һәр бир гуруппини 2 партийә әзаси назарәт қилидикән.

Пикирләр (0)
Share
Толуқ бәт