Qaraqash nahiyeside bayraq chiqirishqa 3 qétim qatnashmighanlarning lagérgha yollinidighanliqi ashkarilandi

Muxbirimiz erkin
2019-10-21
Élxet
Pikir
Share
Print

21‏-Öktebir, qaraqash nahiyesining bayraq chiqirishni birlikke keltürüsh, ölchemleshtürüsh we qa'idileshtürüsh toghrisidiki höjjiti chet'eldiki ijtima'iy taratqularda tarqilip, közetküchilerning alahide diqqitini qozghidi.

Höjette körsitilishiche, eger herqandaq bir puqra özi turushluq kentning bayraq chiqirish murasimigha 3 qétim yaki uningdin artuq sewebsiz qatnashmisa lagérgha élip kétilidiken. Mezkur höjjette, her qétimliq bayraq chiqirish murasimini qandaq ötküzüsh, qandaq bashqurush, puqralargha qandaq teleplerni qoyush, her qétimliq bayraq chiqirishta kimlik tekshürüsh qatarliq ehwallar tepsiliy chüshendürülgen. Höjjette qeyt qilinishiche, bayraq chiqirishqa 3 qétim yaki uningdin artuq qatnashmighanlar lagérgha élip kétilgen sirt, 2 qétim sewebsiz qatnashmighanlar kechlik siyasiy öginishke yollinidiken, bir qétim sewebsiz qatnashmighanlar bolsa kent amanliq mudiri teripidin chaqirtilip, "Terbiye" bérilidiken.

Höjjette, "Öz özini tekshürüsh, arilap tekshürüsh we nazaret qilish sheklini birleshtürüsh arqiliq asasi qatlam partiye teshkilatlirining bayraq chiqirish murasimini omumyüzlük igilep turushi ishqa ashurulghanliqi", kent we ijtima'iy rayonlardiki ammining murasimgha qatnishish nisbiti 90 % tin ashqanliqi tekitlen'gen.

Xitay hökümiti yéqinqi yillarda her düshenbe küni etigende bayraq chiqirish murasimi ötküzüshni yolgha qoyup, mezkur pa'aliyetni her bir Uyghurning mewqesini sinaydighan bir siyasiy ölchemge aylandurghan. Lékin bu belgilime Uyghur kishilik hoquq teshkilatlirining qattiq tenqidige uchrap kelgen. Ular, bu murasimning "Uyghurlargha qiliniwatqan siyasiy we pisxlogiyelik bésim" ikenliki we kent xelqining turmushigha zor qulaysizliqlarni yaritip bériwtaqanliqini tekitlep kelgenidi. Höjette körsitilishiche, nöwette qaraqash nahiyesige qarashliq 3384 kent we ijtima'iy rayonlarda bir tutash tekshürüsh ishiki we kimlik tonush sistémisi qurulup, 7 kishilik bayraq qoghdash etriti tesis qilin'ghan. Her bir kenttiki puqralar guruppilargha bölün'gen bolup, her bir guruppini 2 partiye ezasi nazaret qilidiken.

Toluq bet