Муқимлиқ хизмәтлирини орунлаштуруш йиғинида қаттиқ зәрбә бериш тәкитләнди

27-Феврал күни вә өткән һәптә үрүмчи қатарлиқ җайларда кәң көләмлик террорлуққа қарши қәсәмяд вә һәрбий һәйвә көрситиш паалийәтлири өткүзүлгәндин кейин, 28-феврал күни уйғур аптоном районлуқ коммунистик партийә комитети үрүмчидә кеңәйтилгән йиғин чақирип, нөвәттики муқимлиққа аит хизмәтләрни орунлаштуруш елип барған.

Тәңритағ ториниң хәвиридин мәлум болушичә, уйғур аптоном райони партком секретари чен чүәнго риясәтчилик қилған бу йиғинда бир қатар орунлаштурушлар елип берилған болуп, асаслиқ нишан бу йил ечилидиған хитай компартийисиниң 19-қурултийини яхши нәтиҗиләр билән күтүвелишқа қаритилған.

Хәвәрдә илгири сүрүлүшичә, мәзкур муқимлиқ хизмәт орунлаштурушлирида “қаттиқ зәрбә бериш вә юқири бесим позитсийисидә баштин ‏-ахири чиң туруш” тәкитлинип,“террорлуқ вә зораванлиққа зәрбә бериш”ниң үч хил шәкли, йәни “ениқ өлчәм билән зәрбә бериш”, “тар‏-мар қилиш характерлик зәрбә бериш”, “гумран қилиш характерлик зәрбә бериш” көрситилгән.

Мәлумки, илгиридин тартип қаттиқ зәрбә бериш, “баш көтүргән һаман зәрбә бериш”, “бих һалитидә йоқитиш”дегәндәк зәрбә бериш шоарлири изчил тәкитлинип келингән иди.　Йиғинда милләтләр иттипақлиқи тәшвиқати вә тәрбийиси паалийәтлирини елип бериш, үч йиллиқ қош тиллиқ йәсли маарипини омумлаштуруш, диний әсәбий идийиләрниң сиңип киришини чәкләш, вәтәнпәрвәр диний затларни тәрбийиләш һәм қоғдаш вә башқилар тәкитләнгән.

Дуня уйғур қурултийи вә башқа уйғур тәшкилатлириниң билдүрүшичә, уйғур аптоном район даирилири буниңға охшаш йиғинларда қаттиқ зәрбә бериш билән милләтләр иттипақлиқини яхшилашни изчил тәкитләп келиватқан болсиму, әмма хитай һөкүмити өзи етирап қилған уйғурларниң аптономийә һоқуқлирини күчәйтишни тәкитлигини вә әмәлийәттә көрсәткини йоқ, уйғурларға өзини өзи идарә қилиш һоқуқи беришни халимайду, наразилиқ билдүргүчиләрни болса зәрбә бериш нишани қилип кәлмәктә.