Qazaqistanning 250 tek qazaq köchmenni yurtigha qayturidighanliqi ilgiri sürüldi

Muxbirimiz erkin
2017.10.06

Qazaqistan köchmenler idarisi yéqinda qazaqistanning yéshil kartisi inawetsiz qilin'ghan 250 neper Uyghur élidin kelgen qazaqlarni yurtigha qayturidighanliqini élan qilghan.

Buningdin endishige chüshken qazaqistanda turushluq bezi oralman qazaqlar qazaqistan bash ministiri baqitjan saghintayéfqa xet yézip, ularni Uyghur éligha qayturmasliqni telep qilghan. Qazaqistan axbarat wasitilirining xewer qilishiche, yéshil kartisi bikar qilin'ghan qazaqlar yéshil kartisini qazaqistanning jambul oblastliq köchmenler idarisining bashliqigha para bérip alghan iken.

Qazaqistan ktk téléwiziye qanili ilgiri jambul oblastliq köchmenler idarisining bashliqining chet'ellik köchmenlerge yéshil karta sétip parixorluq qilghanliqini xewer qilghan idi. Qazaqistan köchmenler idarisining xewerliride körsitilishiche, yéshil karta sétiwalghan 250 neper oralman qazaqning yéshil kartisi bikar qilin'ghan. Jambul oblastliq köchmenler idarisining torida 2‏-öktebir élan qilin'ghan uchurida yuqiriqi 250 neper qazaqning yéshil kartiqa iltimas qilish jedwilini toghra toshquzmighanliqi, ularning qazaqistandiki adrésini xata melum qilghanliqi, shu sewebtin ularning yéshil kartisining bikar qilin'ghanliqi tekitlen'gen.

Qazaqistan 1991‏-yili musteqilliq jakarlighandin kéyin, bashqa döletlerdiki qazaqlarni qazaqistan'gha köchüp kélip olturaqlishishqa chaqirghan. Shu munasiwet bilen Uyghur ilidiki nurghunlighan qazaqlar qazaqistan'gha köchüp chiqip, qazaqistan puqraliqigha ötken yaki qazaqistanning yéshil kartisigha érishken idi. Qazaqistan köchmenler idarisining bildürüshiche, yéshil kartisi bikar qilin'ghan bu qazaqlar eger Uyghur éligha qaytip kétishke unimisa, qazaqistan hökümiti ularni mejburi qayturidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.