Gérmaniye kishilik hoquq teshkilati xitaygha qayturuwétilgen Uyghur yashni qutquzushqa chaqirdi

Muxbirimiz erkin
2018-08-20
Élxet
Pikir
Share
Print

Gérmaniye "Tehdit astidiki xelqler teshkilati" bayanat élan qilip, gérmaniye hökümitini gérmaniye köchmenler da'iriliri yéqinda uqushmay xitaygha qayturuwetken Uyghur yashni qutquzuwélishqa chaqirghan.

Bayanatta, bu Uyghur musapiri xitaygha qayturuwétilgen'ge 4 aydin ashqan bolsimu, lékin hazirghiche uningdin héchqandaq uchur yoqluqi, gérmaniye hökümitining bu ishqa ariliship, uni qutquzuwélishini telep qilghan.

Gérmaniye köchmenler da'iriliri bu yil 3-aprél küni 22 yashliq bir Uyghur yashni xitaygha qayturuwetken. Lékin yéqinda uning xitaygha xata qayturulghanliqi ashkarilinip, buninggha köchmenler idarisidiki uqushmasliq seweb bolghanliqi bayqalghan.

Bu yashning xitay hökümiti 3 milyondek Uyghurni yighiwélish lagérlirigha we terbiyelesh merkezlirige qamighan bir mezgilde qayturuwétilishi gérmaniye taratqulirida ghulghula qozghighan.

Gérmaniye hökümet emeldarliri uning qayturulushining "Muwapiq bolmighanliqi" ni bildürgen idi. "Tehdit astidiki xelqler teshkilati" bayanatida, buning héliqi Uyghur musapiri üchün hayat-mamatliq mesilisi ikenlikini eskertip, gérmaniye hökümiti xitaygha qanunsiz qayturuwétilgen bu Uyghurni qoghdash qélish üchün qattiq tirishchanliq körsitishi kérek" déyilgen.

Mezkur teshkilatning diréktori ulrix dél'i'usning ilgiri sürüshiche, "Gérmaniye fédératsiye hökümiti xitayning istratégiyesige qarshi turupla qalmay, uning Uyghur xelqini jazalishinimu ret qilishi kérek" iken.

Bayanatta körsitilishiche, yuqiriqi Uyghur musapiri xitaygha qayturuwétilgendin kéyin gérmaniyening béyjingdiki elchixanisi xitay da'iriliridin uning qayta-qayta iz dérikini qilghan bolsimu, lékin xitay tereptin héchqandaq jawab alalmighan.

Bayanatta yene, xitayning b d t irqiy ayrimichiliqqa qarishi turush komitétining yighinida yighiwélish lagérliri we terbiyelesh merkezlirining mewjutluqini ret qilghanliqi tenqidlinip, "Xelq'ara jem'iyet xitay hökümitige exmeq bolmasliqi kérek. Uyghurlarning jazaliniwatqanliqi bir ré'alliq.

Sanaqsiz guwahliqlar buni ispatlap turidu" déyilgen. Xitay wekiller ömiki b d t irqiy ayrimichiliqqa qarshi turush komitétining 13‏-awghust ötküzülgen yighinida, lagér we terbiyelesh merkezlirini mewjutluqini ret qilip, "Diniy ashqunluq bilen yuqumlan'ghan bezi kishilerning kespiy mekteplerde özgertiliwatqanliqi" ni ilgiri sürgen.

Toluq bet