Gérmaniye hökümiti siyasiy panahliq telep qilghan Uyghurlarni xitaygha qayturuwetmeslik heqqide qarar alghan

Muxbirimiz irade
2018.08.23

Gérmaniye da'iriliri gérmaniyege kélip siyasiy panahliq iltimasi sun'ghan Uyghurlarni xitaygha qayturmasliq heqqide bir qarar élan qilghan.

“Gérmaniye awazi” radi'osining 23-awghust künidiki xewiridin qarighanda, gérmaniye ichki ishlar ministirliqi gérmaniye yéshillar partiyesining bu heqtiki so'aligha jawab bergende, ichki ishlar ministirliqining alaqidar orunlargha gérmaniyede siyasiy panahliq tiligen Uyghurlarni xitaygha qayturmasliq heqqide bir buyruq chüshürgenlikini we bu buyruqning qachan bashqa bir özgirish bolmighuche birdek ijra qilinidighanliqini éytqan.

Gérmaniye köchmenler idarisi bu yil 3-aprél küni gérmaniyede panahlinip turuwatqan 22 yashliq bir Uyghur yashni xitaygha qayturuwetken. Weqe yéqinda ashkarilan'ghandin kéyin gérmaniye köchmenler idarisi buninggha bir uqushmasliqning, yeni bérlindin bawariye köchmenler idarisige ewetilgen bir fakisning munasiwetlik xadimlarning qoligha tegmigenlikining seweb bolghanliqini bildürgen idi.

Bu Uyghur yashning xitaygha qayturulghan waqtining del bir milyondin artuq Uyghur yighiwélish lagérlirigha qamalghan, rayondiki irqiy tazilash ewjige chiqqan bir mezgilge toghra kélishi xelq'arada zor ghulghula we tenqidlerge seweb boldi. Xelq'araliq taratqularning küchlük bésimigha duch kelgen gérmaniye hökümiti eyni chaghda mezkur Uyghur siyasiy iltijachining xitaygha qayturulushining “Muwapiq bolmighanliqi” ni étirap qilghan idi.

Dunya Uyghur qurultiyi bu heqte jiddiy inkas qayturup, gérmaniye hökümitining bu qararini qarshi alidighanliqini, emma gérmaniye hökümitining kéchikip chiqarghan bu qarari we köchmenler idarisining ish béjirishtiki sewenliki sewebidin xitaygha qayturulghan 22 yashliq bu Uyghur yashning iz-dérikini dawamliq sürüshte qilishni telep qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.