Қазақистанда турушлуқ бир уйғур хитайға қайтурулуш хәвпигә дуч кәлгән
2021.11.12
Қазақистанниң павлодар шәһиридә турушлуқ бир уйғур қазақистан көчмәнләр даирилириниң униң қазақистанда туруш рухсәтнамисини бикар қилиши сәвәблик хитайға қайтурулуш хәвпигә дуч кәлгән. “азатлиқ радийоси” ниң хәвәр қилишичә, павлодар шәһридики раюнлуқ көчмәнләр сақчсиси бу уйғурниң қазақистанда туруш рухсәтнамисиниң қанунсиз тарқитилғанлиқи, униң бикар қилиниши керәкликини ейтқан.
Исмаил обулқасим исимлик бу уйғурниң адвокати алмагүл баһралинова районлиқ көчмәнләр сақчисиниң 10-ноябир күни исмаил обулқасимниң паспорти билән қазақистанда туруш рухсәтнамисини елип кәткәнлики, тәкшүргүчиләрниң арқидин униңға хәт йезип, нурсултан көчмәнләр идарисиниң бу рухсәтнамиси исмаил обулқасимға қанунсиз тарқитилғанлиқи, униң бикар қилиниши керәкликини билдүргән. Бу, или тәвәсидин қазақистанға келип панаһланған кишиләрниң тунҗи қетим бундақ тәһдиткә учриши әмәс.
Қазақистан даирилири бурунму уйғур елидин қечип келип панаһлиқ сориған пуқраларға бундақ тосқунлиқларда болған. Адвокат алмагүл баһралинованиң “азатлиқ радийоси” ға ейтишичә, қазақистанда қанунлуқ олтурақлашқан бирсиниң рухсәтнамисини бикар қилиш үчүн, мувапиқ йәкүн чиқириш һәмдә һөҗҗәтни әмәлдин қалдуруш тоғрисида қарар чиқириш керәк икән. Бирақ у көчмәнләр сақчилириниң “сиз бу соални нурсултандин сораң, биз пәқәт рухсәтнамини қайтурувелишимиз керәк,” дегәнликини билдүргән. Мәлум болушичә, қазақистан сақчи даирилири исмаил обулқасимниң хитайға қайтиш үчүн бир айлиқ мөһләт бәргән.