Или областидики қазақ дини затларму тәқибләшләргә учриған

Мухбиримиз үмидвар
2018-01-07
Елхәт
Пикир
Share
Принт

Радиомиз хитай бөлүминиң хәвәр қилишичә, уйғур дияриниң бәзи җайлиридики мәсчитләрдә имамлар йоқ дейәрлик вәзийәт пәйда болған болуп, радиомиз хитай бөлүмигә әһвал инкас қилған бәзи қазақлар или области тәвәсидики көп қисим уйғур вә қазақ диний затларниң тутқун қилиниш, яки «ява имамларни тәрбийиләш мәркизигә йиғивелиниш» сәвәбидин һәтта вапат болғанларниң дәпнә мурасимлириға йетәкчилик қилидиған дини зат чиқмайдиған әһваллар йүз бәргән. Инкас билдүргүчиләр йәнә қорғас наһийисидики бир тәрбийиләш мәркизигә бир қанчә миң қазақ вә уйғурларниң соланғанлиқини мәлум қилған.

Йәрлик аһалиләрдин игилигән учурларға асасән уйғур дияриниң һәр қайси җайлирида, болупму җәнуби районлардики тәрбийиләш мәркизи дәп нам берилгән йиғивелиш мәркәзлиригә соланғанларниң арисида көп қисим диний затлар, кишиләргә вә аилә-әзалириға дини тәрбийә бәргән кишиләр барлиқи илгириму радиомиз тәрипидин хәвәр қилинған иди. Һәтта даириләр йәнә дини әсәбийликниң ипадилирини елан қилип, уйғур, қазақ қатарлиқларниң оруниши, күндилик турмушида дини түс алған сөз-аталғуларни ишлитиши, телефонлирида дини мәзмундики син яки текистләрни сақлиши, мусулманчә исим қоюши қатарлиқ түрлүк әһвалларни чәкләш вә зәрбә беришни йолға қойған иди.

Нөвәттә қазақлар арисидики бир қисим амма вә диний затларниңму охшашла «йепиқ тәрбийиләш мәркәзлиригә солунуватқанлиқи вә қазақларниңму охшашла дини етиқад, тил вә өрп-адәт җәһәтләрдин тәқибләшләргә учраватқанлиқи» көпләп инкас қилиниватқан болуп, бу мәсилидә өткән йили бир қисим қазақ пуқралири астана вә алмутада мухбирларни күтүвелиш йиғини чақирған һәм қазақистан һөкүмитини бу мәсилиләргә көңүл бөлүшкә чақирған иди.

Пикирләр (0)
Share
Толуқ бәт