Qazaq hökümiti öktichilerni qoyup bérishke chaqirildi

Muxbirimiz jüme
2016.05.21

Kishilik hoquqni közitish teshkilati 19 - may élan qilghan bayanatida qazaqistan hökümitini 21 - may ötküzülüshi pilan qilin'ghan kölemlik namayishtin burun öktichilerni qoyup bérishke hemde öktichilerge qaritilghan zorawanliqini ayaghlashturup, qazaqistanda tinch yosundiki namayishlargha yol bérishke chaqiridi.

Melum bolushiche, yéqinda qazaq da'iriliri qazaqistanning yer ishlitish qanunigha bir tüzitish kirgüzüsh layihisini otturigha qoyghan. Eger mezkur layihe qanun qilip maqullansa, bu chet'el puqralirining qazaqistanda térilmighan yerlerni ijarige élishigha yol achidiken.

Bu qazaqistandiki bir qisim öktichi pa'aliyetchilerning naraziliqini qozghighan. Ulardin bir nechchisi 16 - we 18 - may künliri qolgha élin'ghan. Qazaqistan sotliri bularning üstidin aldirashla sot échip, bulardin kem dégende 6 nepirini 15 künlük qamashni qarar qilghan.

Kishilik hoquqni közitish teshkilati yawropa we ottura asiya ishliri tetqiqatchisi mihra ritman mundaq dédi: “Héchkim tinch yosundiki namayishqa qatnishidighanliqi üchünla qamap qoyulmasliqi kérek. Qazaq hökümiti namayish pilanigha chétilip tutulghanlarning hemmisini derhal qoyuwétishi, 21 - maydiki namayishning ötküzülüshige yol bérishi we munasiwetlik qanunlarni jama'et pikri qatnashturulghan asasta özgertishi kérek.”

Erkin yawropa radi'osining xewer qilishiche, qazaq da'iriliri yéqinqi künlerdin buyan almata, astana qatarliq sheherlerde bir nechche pa'aliyetchige qisqa muddetlik qamaq jazasi höküm qilghan.

Ötken bir nechche heptidin buyan qazaqistanning bir nechche shehiride yuqiriqi qanun layihisige qarishi naraziliq namayishliri ötküzülgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.