Қазақистандики хитай әлчиханиси уйғур елидики қазақларниң бесимға учраватқанлиқини инкар қилди

Мухбиримиз ирадә
2017-11-30
Елхәт
Пикир
Share
Принт

Хитайниң қазақистанда турушлуқ әлчиханиси баянат берип, уйғур дияридики қазақларниң уйғурларға охшашла кәк көләмлик сиясий тәқиб вә қолға елинишқа дучар болуватқанлиқи һәққидики хәвәрләрниң асасий йоқлуқини илгири сүрди.

29-Ноябир күни хитайниң қазақистанда турушлуқ әлчиханисиниң тор бетигә «хитайдики қазақ пуқралири һәққидики ялған хәвәрләр һәққидә бир қанчә ениқлима» намлиқ бир уқтуруш елан қилған. Уқтурушта бир қисим мәтбуат вә тор бәтләрниң хитайдики қазақ пуқралири һәққидә ялған хәвәрләрни тарқитип, қәстән қутратқулуқ қилишқа урунуватқанлиқини илгири сүрүлгән һәмдә көпчиликни бу хәвәрләргә ишәнмәсликкә вә уни тарқатмаслиққа чақирған.

Һалбуки, бу уқтуруш елан қилиништин бир күн аввал, қазақистан ташқи ишлар министирлиқи 28-ноябирдики ахбарат елан қилиш йиғинида қазақистанниң муавин ташқи ишлар министири ақилбек камалидинофниң хитай тәрәпкә «қазақистан хитайдики қазақлардин көпләп наразилиқ әрзи тапшурувалди,» дегәнликини, икки тәрәп оттурисида шу күни өткүзүлгән сөһбәттә асаслиқ мушу мәсилиниң муһакимә қилинғанлиқини билдүргән иди. Баянатта йәнә камалидиновниң келәр айдики хитай зияритидиму мушу мәсилини мәхсус музакирә қилидиғанлиқи әскәртилгән иди.

Радийомизниң йәрликтин әһвал игилиши давамида уйғур елидики қаттиқ сиясий вәзийәтниң әмди уйғурлардин һалқип, районда яшаватқан қазақ вә қирғизларғиму охшаш күлпәтләрни елип келиватқанлиқи ашкариланди. Бу һәқтә америкидики «дипломат» жорнилиму мәхсус хәвәр елан қилди.

Әмма қазақистандики хитай әлчиханисиниң уқтурушида хитай пуқралириға четилидиған ишларниң хитайниң «ички иши» һесаблинидиғанлиқини, «һечқандақ бир дөләтниң униңға арилишиш һоқуқи йоқлуқи» алаһидә әскәрткән.

Пикирләр (0)
Share
Толуқ бәт