Qazaq yazghuchi we zhurnalist dilshat oralbayning lagérgha élip kétilgenliki ilgiri sürüldi

Muxbirimiz erkin
2019-11-20
Élxet
Pikir
Share
Print

Qazaq yazghuchi, zhurnalist we terjiman dilshat oralbayning-2018yili tutqun qilinip, lagérgha élip kétilgenliki ilgiri sürüldi.

Dilshat oralbayning qazaqistanda turushluq singlisi gül'ayshaning radi'omizgha bildürüshiche, u dilshat oralbay 2018‏-yili tutqun qilinip lagérgha élip kétilgendin béri uning héchqandaq iz-dérikini alalmighan. Dilshat oralbay 1987‏-yili aliy mektepni püttürgendin kéyin "Ili géziti", ili oblastliq siyasiy kéngesh, "Küytun géziti" qatarliq jaylarda muxbir, terjiman we edebiy tehrir bolup ishligen. Bu jeryanda u "Kapitan gtantining qizliri" qatarliq 15 kitab, "Erkinlik" qatarliq 30 parche powést we hékaye, 150 tek téléwiziye tiyatirini qazaqchigha terjime qilghan. Uning singlisining bildürüshiche, dilshat oralbayning on nechche parche maqalisi ilgiri Uyghur aptonom rayonluq hökümetning mukapatigha érishken iken. Gül'aysha 19‏-noyabir küni radi'iyomizgha bergen uchurida, dilshat oralbayning 2008‏-yili pénsiyege chiqip, qazaqistan'gha köchüp chiqqanliqini, uning qazaqistanda plastik dérize zawuti qurup tijaretke kirishkenlikini bildürgen.

Uning qeyt qilishiche, dilshat oralbay 2016‏-yili qazaqistanda yashaydighan xitay girazhdanlirining qaytip kélish heqqidiki chaqiriqigha egiship, Uyghur rayonigha qaytip kelgen. Lékin u qaytip kélishige da'iriler uning pasportini tartiwalghan. Gul'aysha, 2018‏-yili dilshat oralbay bilen yene bir chong akisi we ikki singlisining tutqun qilinip, lagérgha élip kétilgenliki, gerche chong akisi qoyup bérilgen bolsimu, lékin dilshat oralbay bilen ikki singlisining hazirghiche iz-dériki yoqluqini bildürgen.

Xitay hökümitining 2017‏-yili 2‏-ayda bashlan'ghan keng kölemlik tutqunida 2 milyondek Uyghur we qazaq lagérgha élip kétilgen. Bezi tutqunlar lagérlarda sotlinip, qamaq jazalirigha höküm qilin'ghanidi.

Toluq bet