Қазақистан парламентиниң муавин башлиқи үрүмчидә зиярәттә болди

Мухбиримиз үмидвар
2017.12.04

Йеқиндин буян уйғур дияридики қазақларниң хитай даирилири тәрипидин түрлүк шәкилдә тәқипләшкә учраватқанлиқиға аит хәвәрләр вә қазақистан һөкүмитиниң бу мәсилигә диққәт қилишқа башлап, буни хитай тәрәпниң алдиға қойғанлиқиға аит учурлар оттуриға чиқиватқанда, қазақистан парламентиниң бир юқири дәриҗилик рәһбири башлиған өмәк үрүмчидә зиярәттә болди.

Хитай мәтбуатлириниң ашкарилишичә, қазақистан парламенти юқири палатасиниң муавин башлиқи громов башчилиқидики өмәк, 2-декабир күни үрүмчидә уйғур аптоном райони рәиси шөһрәт закир билән учришиш өткүзгән. “шинҗаң гезити” ниң бу һәқтики хәвиридә икки тәрәпниң 25 йилдин буян давамлишиватқан һәмкарлиқлирини мәдһийәләшкәнлики ейтилип, уйғур дияридики қазақлар мәсилиси вә яки мунасивәтлик мәсилиләр һәққидә сөз болған яки болмиғанлиқи һәққидә һечнемә дейилмигән.

Уйғур дияридин қазақистанға йәрләшкән бир қисим қазақ зиялийлири йеқиндин буян қазақистан пуқралиқини қобул қилған яки қазақистанниң турушлуқ рухсәтнамисини алған қазақларниң уйғур диярида қалған уруқ-туғқанлириниң дәхли-тәрузға учраватқанлиқи, бир қисим қазақ дини затлири вә қазақ пуқраларниң түрмиләргә ташланғанлиқи, қазақларниң өз тилини ишлитиш һоқуқлириниң чәклиниватқанлиқидин шикайәт қилишқан иди. Қазақистан ташқи ишлар министирлиқ бу әһвални хитай тәрәпниң алдиға қойған болсиму, әмма 29-ноябир күни хитайниң қазақистанда турушлуқ әлчиханиси баянат берип, қазақларниң тәқибләшкә учраватқанлиқини инкар қилған һәмдә қазақистан тәрәпни қазақлар һәққидә чиққан мундақ “ялған хәвәрләр” гә ишәнмәсликкә чақирған иди.

Хитай тәрәп қазақистан парламентиниң рус миллитидин келип чиққан муавин рәиси сергей громов билән болидиған учришишни уйғур аптоном райони рәиси шөһрәт закирға орунлаштурған. Көзәткүчиләрниң ейтишичә, бу учришишқа йәнә уйғур аптоном районлуқ хәлқ қурултийиниң қазақ миллитидин болған муавин мудири мәнин зәйнули, аптоном район муавин рәиси җарулла һисамидин қатнаштурған болуп, бу, уйғур, қазақ әмәлдарларни оттуриға чиқирип, уларниң һоқуқлириниң юқири икәнликини көрситиш тактикисидин ибарәт икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.