Qazaqistan parlaméntining mu'awin bashliqi ürümchide ziyarette boldi

Muxbirimiz ümidwar
2017.12.04

Yéqindin buyan Uyghur diyaridiki qazaqlarning xitay da'iriliri teripidin türlük shekilde teqipleshke uchrawatqanliqigha a'it xewerler we qazaqistan hökümitining bu mesilige diqqet qilishqa bashlap, buni xitay terepning aldigha qoyghanliqigha a'it uchurlar otturigha chiqiwatqanda, qazaqistan parlaméntining bir yuqiri derijilik rehbiri bashlighan ömek ürümchide ziyarette boldi.

Xitay metbu'atlirining ashkarilishiche, qazaqistan parlaménti yuqiri palatasining mu'awin bashliqi gromow bashchiliqidiki ömek, 2-dékabir küni ürümchide Uyghur aptonom rayoni re'isi shöhret zakir bilen uchrishish ötküzgen. “Shinjang géziti” ning bu heqtiki xewiride ikki terepning 25 yildin buyan dawamlishiwatqan hemkarliqlirini medhiyeleshkenliki éytilip, Uyghur diyaridiki qazaqlar mesilisi we yaki munasiwetlik mesililer heqqide söz bolghan yaki bolmighanliqi heqqide héchnéme déyilmigen.

Uyghur diyaridin qazaqistan'gha yerleshken bir qisim qazaq ziyaliyliri yéqindin buyan qazaqistan puqraliqini qobul qilghan yaki qazaqistanning turushluq ruxsetnamisini alghan qazaqlarning Uyghur diyarida qalghan uruq-tughqanlirining dexli-teruzgha uchrawatqanliqi, bir qisim qazaq dini zatliri we qazaq puqralarning türmilerge tashlan'ghanliqi, qazaqlarning öz tilini ishlitish hoquqlirining chekliniwatqanliqidin shikayet qilishqan idi. Qazaqistan tashqi ishlar ministirliq bu ehwalni xitay terepning aldigha qoyghan bolsimu, emma 29-noyabir küni xitayning qazaqistanda turushluq elchixanisi bayanat bérip, qazaqlarning teqibleshke uchrawatqanliqini inkar qilghan hemde qazaqistan terepni qazaqlar heqqide chiqqan mundaq “Yalghan xewerler” ge ishenmeslikke chaqirghan idi.

Xitay terep qazaqistan parlaméntining rus millitidin kélip chiqqan mu'awin re'isi sérgéy gromow bilen bolidighan uchrishishni Uyghur aptonom rayoni re'isi shöhret zakirgha orunlashturghan. Közetküchilerning éytishiche, bu uchrishishqa yene Uyghur aptonom rayonluq xelq qurultiyining qazaq millitidin bolghan mu'awin mudiri menin zeynuli, aptonom rayon mu'awin re'isi jarulla hisamidin qatnashturghan bolup, bu, Uyghur, qazaq emeldarlarni otturigha chiqirip, ularning hoquqlirining yuqiri ikenlikini körsitish taktikisidin ibaret iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.