Ablet kamalofning "Qazaqistan Uyghurliri" namliq yéngi kitabi rus we qazaq tillirida yoruq körgen

Muxbirimiz qutlan
2017-02-04
Élxet
Pikir
Share
Print

Qazaqistanliq Uyghur tetqiqatchi, doktor ablet kamalofning "Qazaqistan Uyghurliri" namliq ilmiy emgiki yéqinda qazaqistan paytexti astanada rus we qazaq tillirida birla waqitta neshir qilin'ghan.

"Uyghur awazi" gézitining xewer qilishiche, mezkur kitab tetqiqatchi ablet kamalofning qazaqistan prézidénti yénidiki dölet bashqurush akadémiyesining ilmiy layihesi da'iriside élip barghan ilmiy tetqiqatning netijisi iken.

Mezkur kitab jem'iy besh babtin teshkil tapqan bolup, birinchi babi Uyghurlarning shekillinish tarixi we Uyghur-qazaq munasiwetliri tarixigha béghishlan'ghan. Ikkinchi babida ili Uyghurlirining yettesu wadisigha köchüshi we qazaqistan Uyghurlirining 20-esirdiki tereqqiyat tarixi yorutulghan. Qalghan üch babi mezkur kitabning asasliq mezmunini teshkil qilghan bolup, qazaqistan Uyghurlirining qazaqistan musteqil bolghandin buyanqi 20 nechche yil jeryanidiki siyasiy, iqtisadiy, ijtima'iy we medeniyet özgirishliri höjjetlik we ilmiy tüste bayan qilin'ghan.

"Uyghur awazi" gézitining mezkur kitab heqqide élan mexsus xewiride, "Qazaqistan Uyghurliri" namliq bu kitabning qazaqistandiki Uyghur jem'iyitide yüz bergen ijtima'iy özgirishlerning jeryanini ilmiy jehettin chüshinishte deslepki urunush bolup qalidu, déyilgen.

Aptor ablet kamalof tarix penlirining doktori bolup, u nöwette qazaqistan penler akadémiyesi r. Sulaymanof namidiki sherqshunasliq inistituti Uyghurshunasliq merkizining bash ilmiy xadimi we proféssori bolup xizmet qilmaqta.

Toluq bet