Қазақистан уйғур илидики қазақларниң тутқун қилинишиға қарита хитайға нота тапшурған

Мухбиримиз әркин
2018-02-16
Елхәт
Пикир
Share
Принт

Қазақистан һөкүмити хитайға нота тапшуруп, уйғур елида тутқун қилинған яки «йепиқ тәрбийәләш мәркәзлири» гә соливелинған қазақ пуқралирини дәрһал қоюп беришни тәләп қилған.

Хитай һөкүмити өткән йили өзиниң уйғурларни бастуруш сияситини қазақларға кеңәйтип, қазақистан пуқралиқиға өткән, қазақистанниң йешил картисини алған яки торда қазақистанға даир учурларни тарқатқан нурғун қазақларни тутқун қилған яки «йепиқ тәрбийәләш мәркәзлири» гә соливалған.

Қазақистандики «астана хәвәрлири» телевизийәсиниң җүмә күни тарқатқан хәвиридә қазақистанниң хитайға уйғур елидики қазақ пуқралириниң тутқун қилиниш мәсилиси һәққидә нота тапшурғанлиқини билдүргән. Лекин қазақистанниң нотини қайси дипломатик қаналлар арқилиқ тапшурғанлиқи, уни астанадики хитай әлчиханисиға яки бейҗиңдики қазақистан әлчиханиси арқилиқ хитай ташқи ишлар министирлиқиға тапшурғанлиқи мәлум әмәс.

Қазақистандики вәқәдин хәвәрдар қазақ паалийәтчилириниң радийомизға билдүрүшичә, нотида хитайниң тутқун қилинған қазақистан пуқралирини қоюп бәрмисә, буниң икки дөләт арисидики сода вә башқа җәһәтләрдики мунасивәтлиригә тәсир йәткүзидиғанлиқи агаһландурулған.

Хитай һөкүмити бурун уйғур елидики бастуруш сияситиниң асаслиқ нишанини уйғурларға қаритип кәлгән болсиму, бирақ 2016‏-йилниң ахирлиридин башлап қазақ пуқралириғиму зәрбә беришкә башлиған. 2017‏-Йили «диний әсәбийлик», «торда қанунсиз учур тарқитиш» дегәндәк сәвәбләр билән қазақистан пуқралиқиға өткән яки қазақистанниң йешил картисини алған нурғун қазақларни җазалиған. Бу әһвал өткән йили қазақистан пайтәхти астанада чақирилған «дуня қазақ қурултийи» да бәзи вәкилләр тәрипидин оттуриға қоюлуп, президент нурсултан нәзәрбайефниң хитай билән дәрһал сөзлишишини тәләп қилған. Лекин хитайниң алмутада турушлуқ консулханисиниң баш консули йеқинда ахбарат йиғини өткүзүп, уйғур районида «йепиқ тәрбийәләш мәркәзлири» ниң қурулғанлиқини инкар қилған иди.

Пикирләр (0)
Share
Толуқ бәт