Хитай тәрәп «қазақистанниң ‹әсбийликкә қарши һәрикитимиз' ни чүшәнгини вә қоллиғини үчүн миннәтдармиз» дегән

Мухбиримиз шөһрәт һошур
2019-03-29
Елхәт
Пикир
Share
Принт

Хитай ташқи ишлар министири ваң йи пәйшәнбә күни қазақистан ташқи  ишлар министири атамқулоф билән көрүшкәндә қазақистанниң лагерлар мәсилисидә хитайни тоғра чүшәнгәнлики вә қоллиғанлиқи үчүн миннәтдарлиқ билдүргән.

Ройтерс агентлиқиниң хәвиридә әслитишичә, қазақистан һазирға қәдәр уйғур районида лагерларға соливелинған қош вәтәндашлиқи бар қазақларни қутулдуруш үчүн хитай тәрәп билән бәлгилик музакирә елип барған болсиму, бу мәсилигә қарита биваситә тәнқидий пикир яки позитсийә билдүрмигән иди. Хәвәрләрдин мәлум болушичә, қазақистан йеқинда лагерлар мәсилисидики байрақдар паалийәтчи серикҗан билашни тутқун, қилип нәзәрбәнд астиға алған. Қазақистанда өткүзүлгән бир соттин кейин күчлүк гуваһчи, йиғивелиш лагериниң сабиқ оқутқучиси сайрагул савутниңму авази пәсәйгән иди.

Мәлум болушичә, ваң йи атамқулоф билән бу қетимлиқ көрүшүштә лагерлар мәсилисидә алаһидә тохталған. У аталмиш «тәрбийәләш мәркәзлири» ниң диний әсәбийлик вә зораванлиқ идийәсини йоқитиш үчүн қурулғанлиқи вә қурулғандин буян көзгә көрүнәрлик нәтиҗигә еришкәнликини әскәрткән. Хитайниң диний әсәбийликкә қарши турушта яхши бир үлгә яратқанлиқини тилға алған ваң йи башқа дөләтләрни хитайниң бу тәҗрибисидин өгинишкә чақирған.

Көзәткүчиләр ваң йиниң бу сөзлирини лагерлар мәсилисидә өзигә ишиништин әмәс, бәлки күнсери улғйиватқан хәлқара җамаәт пикриниң бесимидин қутулууш үчүн, йәни өзини ақлаш үчүн қилғанлиқини илгири сүрмәктә.

Пикирләр (0)
Share
Толуқ бәт