Xitay qazaqistanning qanunsiz köchmenlerge zerbe bérish herikitige inkas qayturdi

Muxbirimiz erkin
2019-04-19
Élxet
Pikir
Share
Print

Yéqinda qazaqistan pütün memliket miqyasida qanunsiz köchmenlerge zerbe bérish herikiti bashlighan.

Közetküchilerning ilgiri sürüshiche, qazaqistan da'iriliri bu heriketning qaysiy dölet köchmenlirige qaritilghanliqini tilgha almighan bolsimu, lékin uning qazaqistandiki xitay köchmenlirige qaritilghanliqi éniq iken. Qazaqistan köchmenler da'irilirining bu herikiti derhal xitay elchixanisining inkasini qozghighan.

Qazaqistanda turushluq xitay elchixanisi shu munasiwet bilen 17‏-aprél küni uqturush élan qilip, qazaqistanda turushluq puqralirini agahlandurghan. Uqturushta qeyt qilinishiche, qazaqistan da'irilirining bu qétimqi qanunsiz köchmenlerge zerbe bérish herikiti nurghun xitay puqralirigha chétilghan. Lékin uningda zadi xitay puqrasining qanunsiz dep tutqun qilin'ghanliqi tilgha élinmighan.

Yéqinda yillarda xitayning qazaqistandiki meblighi we iqtisadi pa'aliyitining kéngiyishige egiship, her xil namlarda qazaqistan'gha kélip yashaydighan xitaylar téz köpeygen. Bezi xitaylar yerlik qazaq qizliri bilen toy qilip, shu bahanide qazaqistanning iqamitige érishken. Lékin xitay nopusining qazaqistanda téz köpiyishi qazaqlarni bi'aram qilishqa bashlighan. Ötken yili qazaqistanda xitaylar bilen toy qilishqa, ulargha iqamet bérishke we yer sétip bérishke qarshi keng kölemlik naraziliq namayishliri partlighan. Sabiq qazaqistan prézidénti nezerbayéf jem'iyetning bésimida xitay shirketlirige yer ijra bérish pilanini waqitliq bikar qilishqa mejbur bolghan idi.

Xitay elchixanisining 17‏-aprél élan qilghan uqturushida yene qazaqistandiki xitay puqralirini wiza mesilisige diqqet qilishqa, qanunluq wiza bilen turushqa, wizisiz ötkünchi yoluchilarning qazaqistanda 72 sa'et turush belgilimisige xilapliq qilmasliqqa, kochigha chiqqanda resmiyetlirini toluq élip chiqishqa, özini qanuniy wasitiler bilen qoghdashqa chaqirghan.

Qazaqistan hökümiti hazirghiche izchil xitayning Uyghur rayonidiki basturush siyasitini qollap, kishilik hoquq teshkilatlirining tenqidige uchrap keldi. Yéqinda qazaqistan Uyghur rayonidiki qazaqlarning kishilik hoquqini qoghdaydighan teshkilat ‏- "Ata yurt" ning qurghuchisi we rehbiri sérikjan bilash'oghlini tutqun qilip astanada nezerbend qilghan idi.

Toluq bet