Ши вә назарбайеф истратегийилик шериклик мунасивитини техиму чоңқурлаштуруш һәққидә бирләшмә хитабнамә елан қилди

Мухбиримиз үмидвар
2013-09-08
Share

Җуңго дөләт рәиси ши җинпиң 6 - сентәбир күни русийиниң санкитпетербург шәһиридики 20 дөләт гуруһиниң йиғинидин кейин қазақистанға қаратқан дөләт ишлири зияритини башлап, астанада қазақистан президенти нурсултан назарбайеф билән икки дөләт һәмкарлиқлири һәққидә сөһбәт өткүзгәндин кейин 7 - сентәбир күни "қазақистан билән хитайниң истратегийилик шериклик мунасивәтлирини техму омумйүзлүк чоңқурлаштуруш бирләшмә хитабнамиси" ни имзалиди.

Қазақистанниң "тәңри" хәвәрләр агентлиқиниң йезишичә, ши җинпиң йәнә астанадики назарбайеф университетида нутуқ сөзләп, икки дөләтниң ортақ һалда йипәк йоли иқтисадий бәлвиқи қурушини тәшәббус қилған һәм сөзидә хитайниң оттура асия районида һөкүмранлиқ қилишни мәқсәт қилмайдиғанлиқини көрсәткән.

Ши җинпиңниң бу сөзи қазақистан агентлиқлири тәрипидин алаһидә тәкитләнди.

Қазақистан билән җуңго рәһбәрлири имза қойған бу йеңи хитабнамидә икки дөләтниң буниңдин кейинки көп саһәләрдики һәмкарлиқлири тәпсилий көрситилгән болуп, бурунқиға охшашла икки дөләтниң бөлгүнчилик, террорчилиқ вә диний әсәбийликкә ортақ қарши туридиғанлиқи тәкитләнгән.

Икки дөләт йәнә бир қетим илгирикигә охшаш бир - бириниң дөләт мәнпәәтини қоғдаш һәққидә вәдә бәргән.

Қазақистандики исмини ашкарилашни халимиған бир уйғур сиясийонинң ейтишичә, бирләшмә хитабнамидики мәзкур мәзмунлар уйғурларниң қазақистан туприқида уйғур дияридики уйғурларниң кишилик һоқуқни өз ичигә алған паалийәтлиригә қоюлған тосақтин ибарәттур.

Шинхуаниң хәвәр қилишичә, ши җинпиң бу қетим йәнә қазақистан баш министири әхмәтоф вә парламент башлиқи қатарлиқ юқири дәриҗилик рәһбәрләр билән сөзләшкән.

У назарбайеф университетидики сөзидә қазақ шаири абайниң сөзлиридин нәқил алған һәм қазақ хәлқини вә қазақистан - хитай достлуқини мәдһийиләйдиған җүмлиләрни көп ишләткән.

Ши җинпиң астана айродромиға йетип кәлгәндә нурсултан назарбайеф өзи айродромға чиқип күтүвалди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт