Qazaqistan emeldari Uyghur rayonigha kélip, erkin soda hemkarliqini ilgiri sürmekchi bolghan

Washin'gtondin muxbirimiz uyghar teyyarlidi
2023.11.29

“Shinjang géziti” ning 11-ayning 28-künidiki xewirige asaslan'ghanda, Uyghur aptonom rayonluq partkom sékrétari ma shingruy qazaqistanning abay oblastining waliysi ulanxayéf bashchiliqidiki wekiller ömiki bilen körüshken.

Ma shingruy ulanxayéfni qarshi alghanda qilghan sözide, yéngi dewrde xitay kompartiyisining shinjangni bashqurush istratégiyesini toluq, toghra we etrapliq yolgha qoyuwatqanliqini tekitligen hemde “Bir belwagh bir yol” qurulushini tézlitish üchün bir qanche jayda erkin soda sinaq rayoni qurghanliqini, ottura asiya we bashqa döletler bilen bolghan hemkarliqni dawamliq chongqurlashturidighanliqini bildürgen؛ abay oblastining shinjangning qoshnisi bolush ewzellikidin paydilinip, xitay bilen qazaqistanning hemkarliqida, rayonlar ara soda-almashturushta muhim rol oynishini ümid qilidighanliqini bildürgen.

Amérika “Uyghur mejburiy emgikini cheklesh qanuni” yolgha qoyup ijra qilghandin buyan, bir qisim xitay mehsulatlirining amérikigha kirishi cheklimige uchrap, xitay sodisigha zerbe bérishke bashlighanliqi we xitayning emdi tereqqiy qiliwatqan asiya, afriqa döletliri, jümlidin ottura asiya bazirigha bekrek köz tikiwatqanliqi, buning üchün Uyghur élide erkin soda rayoni qurup, ottura asiya we bashqa döletler bilen bolghan soda hemkarliqini nahayiti tiz sür'ette tereqqiy qilduruwatqanliqi melum.

Amérikadiki kommunizm qurbanliri xatire fondining aliy tetqiqatchisi adri'an zénz bu yil 25-öktebir élan qilghan “Shinjang aptonom rayonidiki emgek küchlirini yötkesh arqiliq namratliqtin qutuldurushning uqum xaraktérlik özgirishi” namliq maqaliside, Uyghur élidiki éksportning rékort xaraktérlik yuqiri sür'ette köpiyishining muhim sewebliridin biri, del Uyghur rayonining qoshna ottura asiya döletliri bilen bolghan sodisidiki jiddiy tereqqiyatqa munasiwetlik, dep chüshendürgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.