Қазақистан сот мәһкимиси уйғур дияридин кәлгән қазақ аялниң хитайға қайтурулушқа болмайдиғанлиқини қарар қилди

Мухбиримиз әркин
2019-12-23
Share

Қазақистандики бир сот мәһкимиси 23‏-декабир күни қарар чиқирип, чеградин қанунсиз өтүш билән әйлинип сотлиниватқан уйғур диярилиқ бир қазақ аялниң хитайға қатурулушқа болмайдиғанлиқини елан қилған.

Қайшә ақан 2018‏-йили 5‏-айда уйғур дияридин қазақистанға қечип чиқип, сиясий панаһлиқ тилигән. У уйғур дияридики йәрлик даириләрниң уни лагерға қамайдиғанлиқи һәққидә тәһдит салғанлиқи сәвәблик қазақистанға қечишқа мәҗбур болғанлиқини елан қилған. Лекин қазақистан даирилири уни чеградин қанунсиз өтүш билән әйибләп сотқа тартқан. У 2018‏-йили11‏-айдин башлап сотлинип келиватқан иди.

"азадлиқ" радийосиниң хәвәр қилишичә, қазақистанниң яркәнт наһийәлик сот мәһкимиси 23‏-декабир күни сот ечип қайшә ақанни хитайға қайтурушқа болмайдиғанлиқи, шундақла униңға берилгән 6 айлиқ қамақ җазасини тохтитип, униң қазақистандики аилиси билән биргә турушиға йол қоюшни қарар қилған. Қайшә ақан сотта өзиниң қазақистанға сиясий панаһлиқ тиләп кәлгәнликини, хитайға қайтурулмаслиқни тәләп қилидиғанлиқини билдүрүп: "әгәр қайтурулсам җазалинишим мумкин" дегән.

"азадлиқ" радийосиниң хәвиридә қәйт қилинишичә, сот мәһкимиси юқириқи қарарни чиқириштин сәл бурун тәптиш әмәлдари арзугүл имяроваму сотниң қарариға охшаш тәләпни оттуриға қойған икән. Қайшә ақан қазақистан соти хитайға қайтурмаслиқ һәққидә қарар чиқарған тунҗи киши әмәс. 2018‏-Йили 8‏-айда қазақистанниң алмута областтики бир сот мәһкимиси қазақ лагер шаһити сайрагүл саутбайни хитайға қайтурмаслиқ һәққидә қарар чиқарған, әмма униңға сиясий панаһлиқ беришни рәт қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт