Qazaqistan sot mehkimisi Uyghur diyaridin kelgen qazaq ayalning xitaygha qayturulushqa bolmaydighanliqini qarar qildi

Muxbirimiz erkin
2019.12.23

Qazaqistandiki bir sot mehkimisi 23‏-dékabir küni qarar chiqirip, chégradin qanunsiz ötüsh bilen eylinip sotliniwatqan Uyghur diyariliq bir qazaq ayalning xitaygha qaturulushqa bolmaydighanliqini élan qilghan.

Qayshe aqan 2018‏-yili 5‏-ayda Uyghur diyaridin qazaqistan'gha qéchip chiqip, siyasiy panahliq tiligen. U Uyghur diyaridiki yerlik da'irilerning uni lagérgha qamaydighanliqi heqqide tehdit salghanliqi seweblik qazaqistan'gha qéchishqa mejbur bolghanliqini élan qilghan. Lékin qazaqistan da'iriliri uni chégradin qanunsiz ötüsh bilen eyiblep sotqa tartqan. U 2018‏-yili11‏-aydin bashlap sotlinip kéliwatqan idi.

“Azadliq” radiyosining xewer qilishiche, qazaqistanning yarkent nahiyelik sot mehkimisi 23‏-dékabir küni sot échip qayshe aqanni xitaygha qayturushqa bolmaydighanliqi, shundaqla uninggha bérilgen 6 ayliq qamaq jazasini toxtitip, uning qazaqistandiki a'ilisi bilen birge turushigha yol qoyushni qarar qilghan. Qayshe aqan sotta özining qazaqistan'gha siyasiy panahliq tilep kelgenlikini, xitaygha qayturulmasliqni telep qilidighanliqini bildürüp: “Eger qayturulsam jazalinishim mumkin” dégen.

“Azadliq” radiyosining xewiride qeyt qilinishiche, sot mehkimisi yuqiriqi qararni chiqirishtin sel burun teptish emeldari arzugül imyarowamu sotning qararigha oxshash telepni otturigha qoyghan iken. Qayshe aqan qazaqistan soti xitaygha qayturmasliq heqqide qarar chiqarghan tunji kishi emes. 2018‏-Yili 8‏-ayda qazaqistanning almuta oblasttiki bir sot mehkimisi qazaq lagér shahiti sayragül sa'utbayni xitaygha qayturmasliq heqqide qarar chiqarghan, emma uninggha siyasiy panahliq bérishni ret qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.