Qazaqistanda xitayning zoriyiwatqan tesirige qarshi naraziliq namayishliri ötküzüldi

Muxbirimiz irade
2019-09-05
Élxet
Pikir
Share
Print

4-Séntebir charshenbe küni, qazaqistanda xitayning zoriyiwatqan tesirige qarshi namayishlar yüz bergen. Namayishchilar hökümettin xitayning meblegh salghan zawut-karxana qurulushlirini toxtitishni telep qilghan.

Roytérs agéntliqining xewiridin qarighanda, bu namayishlar aldi bilen yekshenbe küni qazaqistanning gherbidiki kichik sana'et shehiri bolghan janga'özinde bashlan'ghan, shu küni 100 etrapida bolghan namayishchi sani düshenbe künige kelgende 300 din éship ketken. Charshenbe küni bolsa, namayishlar qazaqistan paytexti nursultan'gha we eng chong shehiri bolghan almutagha kéngeygen. 

Xewerdin melum bolushiche, charshenbe küni, almuta sheherlik hökümet aldigha yighilghan namayishchilar qollirida "Xitay zawutliri kirmisun" dégen sho'ar taxtilirini kötürüshüp namayish qilghan. 

Roytérsning xewiride éytilishiche, xitay zawutlirigha qarshi bu namayishlargha xitay shirketlirining rayondiki qurulushlirining muhitni bulghishi we bu zawutlar yerlik xelqtin ishchi qobul qilmay, xitaylarni ekélip ishqa orunlashturghanliqtin uning yerlik xelqqe héchqandaq bir paydisining bolmasliqidek amillar biwasite seweb bolghan. Emma shuning bilen birge yene, xitayning qazaqistandiki siyasiy tesirining éship bérishi we xitayning Uyghur élide "Radikalliqni tügitish" nami astida 2 milyon etrapida Uyghur we qazaq qatarliq yerlik milletlerni lagérgha qamap zulum qilishimu qazaqistanda xitaygha nisbeten naraziliq keypiyatining küchiyishige seweb bolmaqtiken. 

Yéqinda qazaqistan da'irilirining Uyghur élidiki lagérlar mesilisini dunyagha ashkarilashta rol oynighan pa'aliyetchi sérikjan bilash'oghlini qolgha élishimu xitayning qazaqistandiki tesir küchining netijisi dep qaralghanidi. Sérikjan bilash'oghli kéyin shertlik halda qoyup bérildi.

Toluq bet