Siyasiy qanun sépidiki Uyghurlarmu qesem bergüzüldi
2017.04.22
Xitay da'iriliri siyasiy qanun sépidiki Uyghurlarnimu “Üch xil küch” ke qarishi qesem bergini salghan.
Qesem bérish murasimini 20-aprél aptonom rayonluq saqchi ofitsérlar institutida ötküzülgen. Tengritagh torining xewer qilishiche, mezkur yighin Uyghur aptonom rayonluq partkomning mu'awin sékrétari we siyasiy qanun komitéti sékrétari ju xeylünning biwasite orunlashturushi bilen ötküzülgen.
Xitay da'iriliri yéqindin buyan mexsus Uyghur ziyaliyliri we dangliq shexslirini asas qilip ularni Uyghurlargha qarita chaqiriq élan qilishqa orunlashturghan.
Mezkur yighindimu pütünley Uyghurlardin terkib tapqan qanun sépidiki atalmish “Ilgharlar” qesem bergen.
Yighinda bulargha wakaliten Uyghur aptonom rayonluq siyasiy qanun komitéti qanun ijra qilishini nazaret qilish ishxanisi mudiri nebijan ibrahim “Aptonom rayonidiki 100 neper ilghar siyasiy qanun kadirining birleshme imzaliq xéti” ni oqup ötken.
Xewerde mundaq körsitilgen: “Siyasiy qanun sépidiki xadim-saqchilar birleshme ochuq xet arqiliq ‛üch xil küch‚ ke qarishi omumiy yüzlük jeng élan qildi.”
Yighigha riyasetchilik qilghan Uyghur aptonom rayonining mu'awin re'isi ju changjiyé “Üch xil küch” we “Ikkiyüzlimichiler” ge jeng élan qilishini qayta tekitligen.
Aldinqi küni Uyghur aptonom rayonning re'isi shöhret zakir, aptonom rayonluq ijtima'iy penler akadémiyisining partkom sékrétari ablet memet qatarliqlar Uyghurlargha qarita ochuq xet élan qilghan.
Shöhret zakir xétide Uyghurlarni agahlandurup, “Uch xil küchlerning qilmishlirigha sükütte turushning, jinayetchilerni qanat astigha élish bolup hésablinidighanliqi” ni éytqan idi.
Shöhret zakirning ochuq xétige inkas qayturghan dunya Uyghur qurultiyi re'is rabiye qadir xanim: “Qorchaq re'is shöhret zakirning bayanlirining özi, xitay hökümitining basturush obyéktining Uyghurlar ikenlikining ispati” dep körsetken idi.