Qeshqer bilen bir qisim chong sheherler arisida ayropilan qatnishi yolgha qoyuldi

Xitayning jenubi awi'atsiye shirkiti qeshqer bilen bir qisim ichkiri xitay sheherliri arisida hawa qatnishini köpeytishni qarar qilghan.

Xitay uchur wasitiliridin ashkarilinishiche, xitayning jenubi awi'atsiye shirkiti nuqtiliq halda qeshqer bazirigha bolghan sélinmini kücheytip, ürümchi-qeshqer awi'atsiye liniyisi asasida yene qeshqerdin xitayning ichkiri ölkilirige qatnaydighan bérip-kélish liniyesini köpeytidiken. Mesilen, 26-marttin bashlap, qeshqer-chéngdu awi'atsiye liniyisi échilip, nöwettiki awi'atsiye liniyisi téximu zichlashturulup, yoluchilarning éhtiyaji qandurulidiken.

Jenubi awi'atsiye shirkiti yene yéngidin qeshqer-korla-shi'en bérip-kélish liniyisi we qeshqer-aqsu-jéngju liniyisi échishni qarar qilghan.

Bélet bahasidimu étibar bérilish yolgha qoyulup, qeshqerdin chéngdugha baridighan bélet bahasi 640 somdin bashlidinidiken.

Melum bolushiche, jenubi awi'atsiye shirkiti 26-marttin étibaren jéjyangning xangju shehiri bilen aqsu arisidiki aqsu-ürümchi-xangju nöwetchi ayropilanlirining uchush qétim sanini köpeytidighanliqini qarar qilghan idi.

Hazir aqsu asasliqi jéjyang ölkisining yardem bérish nishanida bolup, aqsu wilayiti tewesidiki jéjyangliq sodigerlerning sanimu köplep ashqan we ular wilayet yekke tijaretliride muhim salmaqni igiligen.

Qeshqer wilayiti bolsa asasliqi gu'angdong qatarliq ölkilerning“Yardem bérish nishani”da bolghan.

Uyghur közetküchilirining qarishiche, qeshqer, aqsu, qatarliq sheherler bilen ichkiri xitay sheherliri arisida mundaq ayropilan qatnishini köpeytish emeliyette bu jaylardiki xitay köchmen ahalisining téximu éshiwatqanliqi, shuningdek da'irilerning qatnash wasitilirini yaxshilash arqiliq qeshqer qatarliq Uyghur sheherliri bilen ichki xitay ölkiliri arisidiki alaqini zichlashturiwatqanliqini körsitidiken.