“Qeshqerde qayta uchrishish” namliq Uyghur tetqiqatigha béghishlan'ghan yéngi in'glizche kitab bril neshriyatida yoruq körgen
2016.10.22
Igilinishiche, Uyghur tetqiqatigha béghishlan'ghan xelq'ara ilim sahesidiki eng yéngi kitab - “Qeshqerde qayta uchrishish” en'gliyediki dangliq neshriyat - bril teripidin yéqinda neshir qilin'ghan.
Bu kitab meshhur shiwét Uyghurshunasi we diplomat gunnar yarringni yad étish munasiwiti bilen 2013 - yili daniyening kopénxagén uniwérsitétide Uyghurshunasliq boyiche ötküzülgen xelq'ara ilmiy muhakime yighinida oqulghan ilmiy maqalilar asasida yoruqluqqa chiqqan iken.
Mezkur kitabqa Uyghur tetqiqati sahesidiki 16 neper tetqiqatchining Uyghur tili, medeniyiti, tarixi, folklori hemde yéqinqi zaman Uyghur til - yéziqidiki tarixiy höjjetler we wesiqiler shundaqla bügünki Uyghur jem'iyiti heqqidiki antropologiyelik tetqiqatlargha béghishlan'ghan yoqiri sewiyelik ilmiy maqaliliri tallap kirgüzülgen iken.
Bril neshriyatining mezkur kitabning neshir qilinish munasiwiti bilen chiqarghan kitab xewiride mundaq déyilgen: “16 Aptorning mezkur kitabqa tallan'ghan 14 parche maqalisi adimiyet we ijtima'iy penlerning türlük küzitish nuqtisidin Uyghur tetqiqatining eng yéngi mesililirige analiz yürgüzgen. Tarix, tilshunasliq, atropologiye we folklor tetqiqati boyiche izdinish élip barghan bu maqalilarda shinjangning ötmüshi we bügüni heqqidiki eng yéngi tetqiqat uchurliri orun alghan.”
“Qeshqerde qayta uchrishish” namliq bu kitabni kopénxagén uniwérsitétining dotsénti ildiko béller xan, stokholm uniwérsitétining proféssori birgit shilitér, yaponiyelik tetqiqatchi jun sugawara qatarliqlar neshirge teyyarlighan.
Melum bolushiche, “Qeshqerde qayta uchrishish” namliq bu kitab bril neshriyatining Uyghur tetqiqati saheside neshir qilghan yene bir yéngi kitabi iken. Mezkur neshriyat yéqinqi yillardin buyan Uyghur tetqiqati saheside köpligen ilmiy eserlerni yoruqluqqa chiqarmaqta.