Nyuyork waqti géziti muxbiri qeshqerde saqchilarning teqibige uchrighan

Muxbirimiz irade
2017-07-20
Élxet
Pikir
Share
Print

Charshenbe küni amérikidiki nopuzluq gézit bolghan nyuyork waqti géziti muxbirining qeshqerdiki ziyaritige asasen yazghan bir parche maqalisi élan qilindi.

Bu xewer maqalisige, "Yipek yolidiki yéshilzarliq qeshqerde xitay saqchisidin qéchish" dep mawzu qoyulghan bolup, muxbir maqaliside qeshqerdiki éghir teqib we qattiq bixeterlik tedbirliri üstide alahide toxtalghan.

Muxbir édward wangning bayan qilishiche, bu uning qeshqerni 1999-yilidin béri 5-qétim ziyaret qilishi bolup, u bu qétim özining qeshqerde ilgiriki yillargha qarighanda téximu köp saqchi, puqrache kiyin'gen saqchi we her kocha béshida turghan "Qulayliq saqchi ponkitliri" ni körgenlikini shundaqla hemmila yerde ésilip turghan bixeterlik kaméralirini körüp heyran qalghanliqini bayan qilghan.

Uning éytishiche, u ilgiriki ziyaretliride özige egishiwalghan puqrache kiyin'gen saqchilarni bayqimighan iken, biraq bu nöwet méhmanxanidin chiqar-chiqmayla bir nepiri Uyghur, ikki kishi keynige kiriwélip, negila barsa teqib qilghan hetta uni agahlandurup "Saqchi we herbiylerni resimge tartishinggha bolmaydu" dégen. U saqchi yene muxbirgha "Biz séni dawamliq közitip turimiz, chünki qeshqer chet'ellikler üchün bixeter emes, bu séning bixeterliking üchün" dégen. Édward wang maqaliside bu heqte toxtilip "Iraqtiki urush mezgilide 3 yérim yil muxbirliq qilghan biri bolush süpitim bilen némining xeterliklikini bilettim, emma men shinjangning héchqandaq yéride özümni xeterde hés qilmighan idim" dégen.

Édward wang xewiri dawamida, chet'ellik mutexessislerning sözini neqil élip turup, chén chüen'go Uyghur éli partkom sékrétari bolup kelgendin béri, Uyghur élini saqchi döliti sistémisi bilen bashquruwatqanliqini bayan qilghan.

Uyghur élidiki mislisiz bixeterlik tedbirliri xelq'aradiki közetküchilerning diqqitini qozghawatqan bolup, téxi yéqinda firansiye agéntliqi muxbirining Uyghur élini ziyaret qilip yazghan maqalisi küchlük tesir peyda qilghan idi.

Toluq bet