Қирғизистанниң йеңи сайланған президенти җүмә күни қәсәм берип вәзипә тапшурувалди

Мухбиримиз әркин
2017-11-24
Елхәт
Пикир
Share
Принт

Қирғизистанниң йеңи сайланған президенти суронбай җенбекоф җүмә күни қәсәм берип, президентлиқ вәзиписини тапшурувалди. Бу, нопуси 6 милйонлуқ қирғизистанда сайлам арқилиқ вәзипигә олтурған рәһбәрләрниң тунҗи қетим һоқуқни өз ара бир биригә тинчлиқ билән өткүзүп беришидур. Бу йил 59 яшқа киргән суронбай җенбекоф қәсәм бериш мурасимида қирғизистанниң «бирликини қоғдашқа» вәдә бәргән.

Қирғизистанниң бурунқи икки президенти 2005 -вә 2010‏-йиллиридики исянда ағдурулған. 2‏-Қетимлиқ исяндин кейин партлиған өзбекләр билән қирғизлар оттурисидики тоқунушта нурғун адәм өлгән иди. Җенбекоф, рус вә қирғиз тиллирида қилған қәсәм бериш мурасимидики сөзидә қирғизларниң миллий дастани - «манас» тин үзүндиләрни нәқил кәлтүрүп, хиянәтчиликкә қарши күрәш қилидиғанлиқини билдүргән. У, «хиянәтчиликкә қарши шәпқәтсиз күрәш башланди. Җәмийәтни тазилашниң шәрт-шараити пишип йитилди,» дегән.

Қирғизистан асаси қанунида президентниң вәзипә өтәш муддити 6 йил билән чәклиниду. Бурунқи президент атамбайеф дәвридә қирғизистан ниспий тинчлиққа еришкән болсиму, әмма һәқиқий ислаһат елип баралмиған.

Фирансийә агентлиқиниң җүмә күни бәргән хәвиридә қәйт қилишичә, атамбайеф өзниң хизмитини муәййәнләштүрүп, «биз һазир йәнила мустәқил дөләт болуп туруватимиз,» дегән. Бирақ чәтәллик бәзи анализчилар җенбекофниң ислаһат елип бериши, хиянәтчиликкә қарши күрәшни қанчилик давамлаштуруши гуманлиқ, дәп қаримақта.

Җенбекоф бу йил 15‏-өктәбир өткүзүлгән сайламда 54 пирсәнт авазға, униң рәқиби өмүрбек бабаноф 35 пирсәнттин артуқ авазға еришкән. Фирансийә агентлиқиниң баян қилишичә, президент җенбекоф атамбайефниң русийәгә маһил сияситини давамлаштурсиму, бирақ у қазақистан билән болған мунасивәтни қандақ түзәш мәсилисигә дуч келидикән. Бу қетимқи сайламда қазақистан президенти нәзәрбайеф җенбекофниң риқабәтчиси өмүрбекни қоллиған иди.

Толуқ бәт