Хитайниң қирғизистандики бир алтун кени йәрлик қирғизларниң һуҗумиға учриди

Мухбиримиз әркин
2018-04-13
Елхәт
Пикир
Share
Принт

Хитайниң җәнубий қирғизистандики җалал-абад областида алтун кан ечиш пилани йәрлик қирғизларниң қаттиқ наразилиқиға учриған. Алдинқи күни бу йәрдики хитай ширкитиниң хизмәт бинаси, амбар, тәҗрибихана вә ишләпчиқириш әсваблириға от қоюп берилгән.

Бу вәқә 11‏-апрел йүз бәргән болуп, шу күни җалал-абад областиниң тоқузтора районида олтурушлуқ 500 дәк қирғиз пуқраси алтун канниң муһитни вәйран қиливатқанлиқини илгири сүрүп, хитай алтун кан ширкитиниң бу райондики қорусиға бастуруп киргән вә униңға от қоюп бәргән.

Вәқәдә өлүп -йетим яки яридар болғанларниң бар-йоқлуқиға даир һечқандақ хәвәр йоқ. Лекин қирғизистан ахбарат васитилириниң хәвәр қилишичә, йәрлик пуқралар қирғизистан-хитай шерикчиликидики макмал GL бирләшмә кан ширкитиниң хизмәт бинаси, амбар, тәҗрибихана вә ишләпчиқириш әсваблириға от қоюп көйдүрүвәткән. Ширкәт қирғизистан ахбарат васитилиригә бәргән учурида ширкәтниң 5 милйон доллардәк мүлкиниң көйүп кәткәнликини билдүргән.

Мәзкур вәқә хитайниң «бир бәлвағ, бир йол» пиланиниң йипәк йолидики дөләтләрни қәрзгә боғуп қойидиғанлиқи агаһландурулуватқан мәзгилдә йүз бәрди.

Көзәткүчиләрниң илгири сүрүшичә, бу дөләтләрниң хитайниң қәрзигә боғулуп қелиши уларниң игилик һоқуқини йоқитип, иқтисадини хитайға тайинидиған қилип қойидикән вә муһитиниң вәйран болуши қатарлиқ еғир ақивәтләрни кәлтүрүп чиқиридикән.

«Азадлиқ радийоси» ниң хәвәр қилишичә, юқириқи вәқә хитай алтун кан ширкитиниң бу районда пишшиқлап ишләш сехи қурушни пиланлиши сәвәблик келип чиққан икән.

Вәқәдин кейин қирғизистан баш министири сәпәр исһақоф район башлиқини вәзиписидин елип ташлиған. «Қирғизистан 24 қанили» ниң хәвиридә ашкарилишичә, қирғизистанниң ош шәһиридә турушлуқ хитай консулханиси қирғизистан даирилиригә наразилиқ билдүрүп, хитай пуқралирини қоғдашни, вәқәни тәкшүрүшкә қатнишишни тәләп қилған.

Пикирләр (0)
Share
Толуқ бәт