Xitayning qirghizistandiki bir altun kéni yerlik qirghizlarning hujumigha uchridi

Muxbirimiz erkin
2018-04-13
Share

Xitayning jenubiy qirghizistandiki jalal-abad oblastida altun kan échish pilani yerlik qirghizlarning qattiq naraziliqigha uchrighan. Aldinqi küni bu yerdiki xitay shirkitining xizmet binasi, ambar, tejribixana we ishlepchiqirish eswablirigha ot qoyup bérilgen.

Bu weqe 11‏-aprél yüz bergen bolup, shu küni jalal-abad oblastining toquztora rayonida olturushluq 500 dek qirghiz puqrasi altun kanning muhitni weyran qiliwatqanliqini ilgiri sürüp, xitay altun kan shirkitining bu rayondiki qorusigha basturup kirgen we uninggha ot qoyup bergen.

Weqede ölüp -yétim yaki yaridar bolghanlarning bar-yoqluqigha da'ir héchqandaq xewer yoq. Lékin qirghizistan axbarat wasitilirining xewer qilishiche, yerlik puqralar qirghizistan-xitay shérikchilikidiki makmal GL birleshme kan shirkitining xizmet binasi, ambar, tejribixana we ishlepchiqirish eswablirigha ot qoyup köydürüwetken. Shirket qirghizistan axbarat wasitilirige bergen uchurida shirketning 5 milyon dollardek mülkining köyüp ketkenlikini bildürgen.

Mezkur weqe xitayning "Bir belwagh, bir yol" pilanining yipek yolidiki döletlerni qerzge boghup qoyidighanliqi agahlanduruluwatqan mezgilde yüz berdi.

Közetküchilerning ilgiri sürüshiche, bu döletlerning xitayning qerzige boghulup qélishi ularning igilik hoquqini yoqitip, iqtisadini xitaygha tayinidighan qilip qoyidiken we muhitining weyran bolushi qatarliq éghir aqiwetlerni keltürüp chiqiridiken.

"Azadliq radiyosi" ning xewer qilishiche, yuqiriqi weqe xitay altun kan shirkitining bu rayonda pishshiqlap ishlesh séxi qurushni pilanlishi seweblik kélip chiqqan iken.

Weqedin kéyin qirghizistan bash ministiri seper is'haqof rayon bashliqini wezipisidin élip tashlighan. "Qirghizistan 24 qanili" ning xewiride ashkarilishiche, qirghizistanning osh shehiride turushluq xitay konsulxanisi qirghizistan da'irilirige naraziliq bildürüp, xitay puqralirini qoghdashni, weqeni tekshürüshke qatnishishni telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet