Qirghizistan xitay elchixanisi hujumchisini “Tajikistan puqraliqidiki Uyghur” dédi
2016.09.06
Roytérs agéntliqining xewer qilishiche, qirghizistan dölet bixeterlik idarisi seyshenbe küni bergen xewiride, 30-awghust qirghizistanning paytexti bishkekte yüz bergen, xitay elchixanisigha qaritilghan aptomobilliq partlitish hujumini sadir qilghuchining tajikistan puqrasi, 33 yashliq Uyghur zahir xélilof ikenlikini, uning nöwette süriyede pa'aliyet élip bériwatqan sherqiy türkistan islam partiyisining ezasi ikenlikini bildürgen.
Roytérsning xewiride déyilishiche, xadimi bayanida, 30-awghust yüz bergen aptomobilliq bomba hujumida partlap ölgen zahir xélilofning süriyede pa'aliyet élip bériwatqan sherqiy türkistan islam partiyisining ezasi ikenlikini tilgha alghan.
Amérika awazining bildürüshiche, weqedin kéyin qirghizistan da'iriliri 5 neper gumandarni qolgha alghan hemde türkiyediki 4 neper gumandarni tutush buyruqi chiqarghan.
30-Awghust yüz bergen bishkektiki xitay elchixanisigha qaritilghan aptomobilliq hujumda, aptomobil shopuri ölüp 2 neper elchixana xadimi we qirghizistan puqraliqidiki bir ayal yarilan'ghan. Weqedin kéyin, xitay hökümiti mezkur hujumni térrorluq hujumi dep eyibligen, deslepki künlerde qirghizistan hökümiti mezkur weqeni tekshüridighanliqini bildürüp, hujumchining kimlikini éniqlap chiqidighanliqini élan qilghan idi.
Qirghizistan dölet bixeterlik idarisining bu xewiri heqqide, musteqil uchur menbelirining ispatlishigha érishelmiduq.