Qirghizistan buningdin kéyin dölet xizmetchilirining pütünley qirghiz tili ishlitishini qarar qildi

Muxbirimiz ümidwar
2017-11-26
Élxet
Pikir
Share
Print

24-Noyabir küni qirghizistanda yéngi prézidént soronbay jéyénbékow qesem bérip wezipige olturush bilen teng qirghizistan bash ministiri buyruq élan qilip, 2019-yilidin étibaren qirghizistandiki pütün hökümet xizmetchiliri choqum qirghiz tilini bilishini telep qildi.

Ottura asiya uchur torining xewer qilishiche, qirghizistan bash ministiri seper issaqofning ötken jüme küni qol qoyghan bu heqtiki buyruqida barliq dölet we puqralar xizmetchiliri, rayon xizmetchiliri, aliy, asasiy, yuqiri we töwen derijilik memuriy wezipilerdikilerning choqum dölet tili, yeni qirghiz tilini bilishi telep qilin'ghan.

Qirghiz tilini öginish üchün 2018-yilidin étibaren qirghizistan ma'arip ministirliqining mexsus derslik teyyarlap chiqirishi belgilen'gen.

Melumki, qirghizistan köp milletlik dölet bolup, qirghizlar ahalining 72% ni teshkil qilidu. Uning kéyin qalsa özbekler, 14%ni, ruslar 6. 4%ni Teshkil qilidu. Ulardin kéyin, Uyghur, tunggan, tajik, türk we bashqilar bar. Qirghizistanda yene ukra'in, gérman qatarliq yawropa milletlirimu yashaydu. Bularning hemmisi öz milliy til-yéziqigha igidur.

Qirghizistanda eslide qirghizlardin kéyinla ruslar asasliq millet bolsimu, biraq qirghizistan musteqil bolghandin kéyin köpligen ruslar rusiyege ketken bolup, hazir 369 ming etrapida rus yashaydu we ularning xéli köp qismi bishkek shehirige jaylashqan. Ular arisida köp sandiki kishiler hökümet, saqchi-armiye, doxturxana, ma'arip, pen-téxnika we bashqa orunlarda xizmet qilidu hem ular arisida xéli köp sandiki her derijilik wezipe ötewatqan kishiler bar iken.

Qirghizistanning bu yéngi belgilimisi boyiche ruslarni öz ichige alghan barliq milletlerdin kélip chiqqan hökümet xizmetchiliri qirghiz tilini bilishi kérek iken.

Buningdin bashqa yene qazaqistan we qirghizistanda sabiq sowét ittipaqi dewride öz ana tilini bilish töwenlep kétip, mutleq köp qisim qazaq we qirghizlar, bolupmu sheher ahalisining öz tilini yaxshi bilmeslik weziyiti shekillen'gen idi. Ene shundaq rus tili ma'aripida yétishken nurghun kishiler bu jumhuriyetlerdiki türlük rehbiri xizmetlerni ötimekte. Shu sewebtin qazaqistan, qirghizistan, özbékistan we türkmenistan qatarliq ottura asiya jumhuriyetliri öz tillirini omumlashturushqa izchil köngül bölüp kelmekte idi.

Toluq bet