Qishliq issinish mesilisi Uyghur diyaridiki kishiler üchün zor mesilige aylanmaqta

Yéqinda Uyghur aptonom rayonluq da'iriler qishliq issinish mesiliside qiyinchiliqi bar kishilerge yardem bérish heqqide mexsus uqturush chiqarghan.

“Shinjang géziti” ning bu 3-noyabirdiki xewiride éytilishiche, qishliq issinish mesilisini hel qilish üchün herqaysi derijilik orunlar öz tewesidiki ammigha “Partiyening illiqliqini toluq yetküzüsh” ke chaqirilghan. Shundaqla bu jehette qiyinchiliqi bar a'ililerge aldi bilen yardem qilish telep qilin'ghan.

Melum bolushiche, Uyghur diyaridiki asasliq issinish wasitisi kömür bolup, ötken birnechche yildin buyan bu mesilining her yili herqaysi jaylardiki minglighan onminglighan namrat Uyghur déhqanlirining bir chong bash aghriqi bolup kelgenlikini radiyomizmu köp qétim delilligenidi. Xitay hökümitining melumatlirida bolsa Uyghur diyarining xitaydiki eng chong kömür bazilirining biri ikenliki, xitay hökümitining bu jaydiki kömürlerni köydürüp gazgha aylandurghandin kéyin ichkirige yötkep kétiwatqanliqi köp qétimlap tilgha élin'ghanidi. Ötken yillargha oxshash bu yilmu herqaysi jaylardiki namrat a'ililerning qishliq issinish mesilisini qandaq hel qilishi her sahe jiddiy köngül bölüwatqan mesililerning biri bolup qalmaqtiken.