Xitay hökümiti Uyghur diyarida "Qizil ma'arip" teshwiqatini kücheytmekte

Muxbirimiz sada
2019-06-18
Élxet
Pikir
Share
Print

Yéqindin buyan xitay da'iriliri Uyghur diyarida xitayning "Inqilabiy en'ene ma'aripigha warisliq qilish" témisidiki "Qizil ma'arip" ni janlandurushqa bashlighan.

"Shinjang géziti" ning xitayche torida 18-iyun élan qilin'ghan munasiwetlik xewerdin melum bolushiche, Uyghur aptonom rayonluq partkom teshwiqat bölümi barliq partiye ezalirini teshkillep 11-iyun we 14-iyun ürümchi qehrimanlar qebristanliqi we xitayning tarixiy muzéylirida ayrim-ayrim ziyaret élip barghan. 

Xewerde partiye ezalirining qebrilerni tawap qilish, xitayning kompartiye bayriqigha qarap turup kommunistik partiyining qesem sözini eslesh qatarliq pa'aliyetlerge teshkillen'genliki we shu arqiliq xitay kompartiyisining atalmish "Qizil rohi" gha "Warisliq qilish" qa yéteklen'genliki bayan qilin'ghan. 

Uningdin bashqa yene xitayning tarixi matériyalliri we medeniyet yadikarliqliri shu qétimliq ziyaretning birqisimi bolghan bolup, bu jeryanda xitay kompartiye ezaliri xitayning "Inqilabiy en'ene ma'aripigha warisliq qilish" témisidiki "Qizil ma'arip" ni qobul qilishqa teshkillen'gen. 

Közetküchilerning éytishiche, nöwette Uyghur diyarida ikki milyon etrapida Uyghur, qazaq qatarliq millet kishiliri yighiwélish lagérlirigha qamilip, ménge yuyush élip bérilishqa duch kélish bilen birge Uyghur tili, Uyghur ma'aripi we medeniyiti xitay hökümiti teripidin qattiq cheklimige uchrap yoqilishqa qarap yüzlendürülgen. Mekteplerde Uyghur milliy medeniyiti, Uyghur tarixi, Uyghurlarning öz qehrimanliri we bashqilargha a'it her qandaq bilim bérish we yaki bu heqte sözlesh cheklen'gen. Uyghur közetküchilirining qarishiche, nöwette yene Uyghurlar arisida, bolupmu yash-ösmürler arisida "Jungxu'a milliti" terghibati keng omumlashturulush bilen bir waqitta yene rayonda "Qizil ma'arip" teshwiqatining ewj élishi xitay hökümitining Uyghur medeniyiti, milliy kimlik we milletperwerlik pikirlirini yiltizidin qurutup, ularni "Xitaylashturush" qa urunushining téximu kücheytiliwatqanliqini körsitidiken.

Toluq bet