Qizilsu oblasti “Qara küchler we rezillikke chétishliq jinayi qilmishlar” ni pash qilish hemde mukapatlash charisini élan qilghan

Qizilsu oblastliq da'iriler yéqinda “Qara küchler we rezillikke chétishliq” jinayi qilmishlarni pash qilish hemde mukapatlash charisini élan qilghan.

Qizilsu oblastliq hökümet torida élan qilin'ghan bu “Chare” de türlük mukapatlash usullirini qollinip, ammini “Qara küchler we rezillikke chétishliq jinayi qilmishlar” ni aktipliq bilen pash qilishqa seperwer qilghan.

Melum bolushiche, “Qara küchler we rezillikke chétishliq jinayi qilmishlar” 12 türni öz ichige alghan bolup, buningdiki eng diqqet tartidighan birinchi nuqta millet we din mesilisige taqalghan. Mezkur “Mukapatlash charisi” ning birinchi türide “Millet, dinni ‛niqab‚ qiliwélip, mushtumzorluq qilghan, yéza-kentlerning saylimigha arilishiwalghan, qanunsiz wez-tebligh éytqan, esebiy idiyelerni terghib qilghan, diniy esebiy qilmishlar bilen shughullan'ghan jinayet shaykiliri” ni pash qilish telep qilin'ghan.

Nöwette xitay da'iriliri qozghighan “Qara küchlerge zerbe bérish we rezillikni tügitish” dolquni Uyghur diyarida kishilerni “Mesile tapshurush” qa yaki “Mesile pash qilish” qa mejburlashtek keng kölemlik heriketke aylinip, xelq'aradiki kishilik hoquq teshkilatlirining endishisi qozghimaqta.

Xitayning rayonda millet we diniy mesilige munasiwetlik ishlarni “Qara küchler we rezillikke chétishliq” jinayi qilmishning bir türige aylandurushi közetküchilerning téximu diqqitini qozghimaqta. Ular bu xitay hökümitining téximu köp Uyghurlargha qamaq jazasi bérish yaki ularni kolléktip halda lagérlargha solash meqsitige bir bahane bolushi mumkin dep qarimaqta.

Korla sheherlik hökümet torining xewirige qarighanda, 15-may korla shehiridin ikki neper kishi “Qara küchler we rezillikke chétishliq jinayi qilmishlarning yip uchini teminligen” liki üchün 30 ming yüen bilen mukapatlan'ghan.