Қағилиқ маарипиниң толуқ “қизиллиши” әмәлгә ашқан

Мухбиримиз әзиз
2018.10.18

Өткән һәптә қағилиқ наһийәлик һөкүмәтниң тор бетидә елан қилинған алақидар учурлардин мәлум болушичә, нөвәттә қағилиқ наһийәси тәвәсидә маарипни “қизиллаштуруш” долқуни әвҗ алмақта икән.

12-Өктәбир күни мәзкур наһийәдә хитай пионерлар әтрити қурулғанлиқиниң 69 йиллиқ хатириси өткүзүлгән. Пүтүн наһийәдики башланғуч вә оттура мәктәп оқуғучилири хитай рәиси ши җинпиңниң “әмәлий һәрикитимиз арқилиқ қизил генни кейинки әвладларға йәткүзәйли” дегәндәк инқилабий шоарини өгиниш, шуниңдәк хитайниң дөләт байриқиға садиқ болидиғанлиқи һәққидә қәсәм бериш дегәндәк паалийәтләргә тәшкилләнгән.

Бу һәқтә берилгән алақидар рәсимлик мәлуматларму оқуғучиларниң пүткүл “өгиниш” муһитиниң “қизиллишип болған” лиқини, мәктәпләрдә уйғурчә маарипқа мәнсуп һечқандақ амилниң мәвҗут әмәсликини көрсәтмәктә икән.

Уйғур өсмүрләргә кичикидин сиясий тәрбийә вә хитай компартийәсигә садиқ болуштин башқа тәрбийә бәрмәслик, мәктәптә уйғур мәдәнийитигә даир мәзмун болмаслиқтәк бу һал һәққидә пикир қилған дуня уйғур қурултийиниң баянатчиси дилшат ришит пикир баян қилди. У “бу хитай һөкүмитиниң уйғур тилини мәктәпләрдә чәкләш тәдбиридин кейин оттуриға чиққан уйғурларни пүтүнләй маңқуртлаштуруш сияситиниң иҗра болуши” дәп көрсәтти.

Хитай һөкүмитиниң алақидар мәлуматлирида көрситилишичә, қағилиқ наһийәсидики 500 миңдин ашидиған нопусниң 93 пирсәнтидин көпрәкини уйғурлар тәшкил қилидикән. Таки йеқинқи мәзгилләргичә қағилиқ наһийәси уйғурлар дияридики көп қетимлиқ қаршилиқ һәрикәтлири барлиққа кәлгән җай болуп, хитай һөкүмитиниң нәзиридә “диний әсәбий унсурларниң увиси” дәп қаралған җайларниң бири һесаблинидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.