Italiye metbu'ati: “Xitay qosh til ma'aripi arqiliq Uyghurlarning qarshiliqini tügetmekchi”

Italiyede neshr qilinidighan “Yawropadiki ishlar” zhurnilining 26-may sanida luka markézini imzasida élan qilin'ghan maqalide xitayning Uyghurlar diyarida “Qosh til oqutushi” programmisi arqiliq Uyghurlar bilen xitaylar otturisidiki milliy ziddiyetlerni peskoygha chüshürmekchi bolghanliqi muhakime qilindi.

Aptor maqaliside Uyghurlar rayonidiki qarshiliq heriketliri we Uyghurlar bilen xitaylar otturisidiki ziddiyetlerning 1949-yilila bashlan'ghanliqini, shu waqitlarda xitay xelq azadliq armiyisining ikkinchi sherqiy türkistan jumhuriyitini yoqitip, uni yéngidin qurulghan xitay dölitige qoshuwalghanliqini esletken. Aptorning pikriche, jahan'girlik xaraktéridiki mushu tajawuzchiliq hazirqi künde mewjut boluwatqan barliq ziddiyetler we qarshiliqlarning tüp menbesi iken.
Maqalide aptor mushu xildiki qarshiliq heriketliri we bashqa milliy ziddiyetlerning 2009-yilidiki “5-Iyul weqesi” din kéyin yuqiri pellige chiqqanliqini éytip, hazir xitay hökümitining bu mesilini hel qilish üchün yerlik Uyghurlargha xitay tili ögitish asasiy meqset qilin'ghan “Qosh til ma'aripi” ni yolgha qoyuwatqanliqini bayan qilghan.

Radiyomizning ilgiriki xewerliri we dunya Uyghur qurultiyining alaqidar melumatlirida xitayning 2020-yiligha qeder bu xildiki “Qosh til” mekteplirini 85% jaylarda omumlashturmaqchi bolghanliqi, bu xizmetning bir qismi süpitide 2016-yili pütün xitay miqyasidin 11 mingdin artuq “Qosh til” oqutquchisi qobul qilmaqchi bolghanliqi xewer qilin'ghan idi.