5000 Neper oqutquchi-kadir qosh til yeslilirige ewetilidiken

Muxbirimiz irade
2017-09-07
Share

Uyghur aptonom rayon da'iriliri bu yil 5000 neper kadir we oqutquchini jenubtiki yéza qosh til yesliliride wezipe öteshke ewetidiken.

"Shinjang etigenlik géziti" de élan qilin'ghan xewerdin qarighanda, bu, jenubtiki 3 wilayet bir oblasttiki yéza qosh til yeslilirige oqutquchi yétishmeslik mesilisini hel qilish üchün élin'ghan tedbir iken.

Xewerde körsitilishiche, qosh til yeslilirige ewetilidighan xadimlar 2017-yilliq küz pesillik oqush mewsumidin bashlap 2020-yilighiche bolghan ariliqta aptonom rayon miqyasi boyiche yéngidin dölet memurliqigha qobul qilin'ghan 3000 neper kadir we 2000 neper yéngi oqutquchini öz ichige alidiken.

Pilan'gha asasen, aqsu wilayitige 1200 neper, qizilsugha 400 neper, qeshqer wilayitige 2000 neper, xoten wilayitige 1400 neper oqutquchi -kadir ewetilidiken.

Uyghur aptonom rayon da'iriliri Uyghur élining jenubidiki yézilarda qosh til yesli qurulushini téz sür'et bilen omumlashturush üchün bu yilning béshida "Sélishqa tégishlikini choqum sélish", "Yeslige kirishke tégishliki choqum yeslige kirish" dep nam bérilgen nishan boyiche bu yil séntebirgiche 4408 yéngi yéza qosh til yeslilirini ishqa kirishtürüp bolghan idi.

Uyghur élide köplep séliniwatqan qosh til yeslilirining oqutquchi mesilisining qandaq hel bolidighanliqi diqqet qozghawatqan mesililerning biri.

Chet'ellerdiki közetküchiler xitay hökümitining buni ichkiri ölkilerdin adem yötkesh arqiliq hel qilidighanliqini mölcherlimekte.

Derweqe, téxi yéqinda istansimiz yeken nahiyisidiki mushundaq qosh tilliq yesli we ottura-bashlan'ghuch mekteplerge qobul qilinidighan 3000 neper oqutquchi sanining pütünley ichkiri ölkilerdin qobul qilin'ghan xitay kandidatlar bilen toldurulghanliqini éniqlap chiqqan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.