Хитай даирилири уйғур елидики қош тиллиқ йәсли қурулушини техиму кеңәйтидикән

Уйғурларға қаритилған аталмиш қош тил сияситиниң үнүми вә мәқситигә соал қоюлуватқан мәзгилдә, хитай даирилири уйғур елидики қош тиллиқ йәсли қурулушини техиму кеңәйтидиғанлиқини елан қилди.

Шинхуа ахбарати 6 - майдики хәвиридә мәзкур қурулушниң районда милләтләр иттипақлиқини илгири сүридиғанлиқини билдүрди.

Хәвәргә қариғанда, хитай һөкүмити уйғур елидики икки йиллиқ қош тил йәсли маарипини буниңдин кейин 3 йилға өзгәртидикән.

Хәвәрдә көрситишичә, даириләр уйғур елидики қош тил йәсли маарипиниң омумлишиш нисбити нөвәттә 75 пирсәнткә йәткәнликини, буниң 2020 - йилиға барғанда 85 пирсәнткә йәткүзүлидиғанлиқини билдүрүшкән.

Ройтерста бу һәқтә берилгән бир парчә хәвәрдә мундақ дейилгән: “йәрлик әмәлдарлар районда һәрхил бәс - муназириләргә сәвәб болған қош тиллиқ маарипниң йәнә кеңәйтишкә моһтаҗ икәнликни илгири сүриду, әмма уйғурлар мәзкур маарипта хитай тили арзулинип, өз ана тилиниң сиқип чиқирилғанлиқидин ғәм йәйду.”

Хәлқара кишилик һоқуқ органлири вә уйғур көзәткүчилири уйғурларға қаритилған қош тил маарип сияситиниң уйғур миллий кимликини суслаштурушни мәқсәт қилидиғанлиқини оттуриға қоюшмақта.

Һалбуки, хитай даирилири мәзкур сиясәтниң уйғурларға әвзәллик елип келидиғанлиқини билдүрүп, униңға қаритилған барлиқ тәнқидләрни рәт қилип кәлгән.

Мәлум болушичә, хитай даирилири бу йил йәнә уйғур елиниң җәнубий районлиридики қош тиллиқ йәсли қурулушиға 1 милярд йүән мәбләғ салған.

Илгири радийомиз зияритини қобул қилған бир оқутқучи, қош тил маарипи сәвәбидин өз оқуғучилириниң ана тил сәвийәси, җүмлидин омумий сапасиниң кишини ойландуридиған дәриҗидә чекинип кәткәнликини билдүргән иди.