“Yershari waqti géziti” xitayning Uyghur élidiki “Qoshmaq tughqan” siyasitini perdazlidi

Muxbirimiz shöhret hoshur
2018.01.03

Xelq'ara axbarat wasitiliri yéqidin buyan Uyghur rayonining nöwettiki weziyiti heqqide birqanchilghan muhim xewerlerni élan qilghan idi. Buning ichide xitay kadirlirining “Tughqan yoqlash” namida Uyghurlarning a'ile ichige qeder nazaretni kéngeytkenliki alahide diqqet tartti.

Bügün “Yer shari waqti géziti” “Shinjangda milletler ittipaqliqi üchün milletler ittipaqliqi heptisi ötküzüldi” dégen mawzuda xewer élan qildi. Xewerde gerche xelq'ara xewerlerdiki yuqiriqi nuqtilar tilgha élinmighan bolsimu, uninggha qarita egitme jawablar bérilgen. Mezkur gézitning in'glizche sanidiki bu xewerde 19‏-qurultayning rohini yetküzüsh, jümlidin milletler ittipaqliqini mustehkemlesh üchün, töwen'ge chüshken kadirlarning naxsha musabiqisi, tenterbiye pa'aliyiti qatarliqlarni uyushturghanliqi tilgha élin'ghan.

Xewerde Uyghur rayonida her bir a'ilidin dégüdek birdin kishining atalmish “Terbiyelesh merkezliri” ge soliniwélin'ghanliqi, Uyghurlarning xitaylar bilen bir dastixanda olturup tamaq yéyishtin seskinidighanliqi qatarliq ré'alliqlar tilgha élinmighan. Xitayning “Qoshmaq tughqan siyasiti” heqqidiki xewerler torlarda hetta bir qisim xitay puqraliriningmu tenqidige uchrighan. Tenqidchiler mezkur siyasettiki chaqiriqining sün'iylikini eyiblesh bilen birlikte usulining mentiqsizliqini mesxire qilishqan idi.

“Yershari waqti géziti” ning “Shinjang géziti” we “Shinjang iqtisad géziti” din neqil élip xewer qilishiche, kadirlarning mezkur “Tughqan yoqlash” pa'aliyiti 11‏-dikabirdin 31‏-dékabirgha qeder ikki hepte dawamlashqan. Emma ötken yili radiyomiz ziyaritini qobul qilghan bortalaliq rabixan musa ana özige belgilep bérilgen “Xitay tughqini” ning kelme désimu öyige kéliwélip özini bizar qilghanliqi heqqide shikayet qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.