Xitay Uyghur diyarida "Qoshmaq tughqanchiliq" siyasitini hedep teshwiq qilmaqta

Muxbirimiz irade
2019-06-27
Share

Xitay hökümiti nöwette Uyghur élida "Qoshmaq tughqanchiliq" we "Milletler ittipaqliship bir a'ile kishiliridek bolush" heqqidiki teshwiqatlirini hedep kücheytken.

Xitayning herqaysiy taratquliridiki teshwiqat xewerliride birdek xitaylar bilen tughqanlashqan, aka-uka bolushqan Uyghur we qazaq qatarliq yerlik millet xelqlirining menpe'etke érishkenliki, ularning bu atalmish xitay "Tughqanliri" ning sayiside bay bolup, namratliqtin qutulghanliqidek teshwiqatlar algha sürülmekte.

"Xitay xewerler tori" ning 27-iyun künidiki sanida élan qilin'ghan bir xewerde aqsu shehirining wangsen kochisidiki "Milletler ittipaqliship bir a'ile kishiliridek bolush" namliq bir ashxana teshwiq qilin'ghan. Xewerde körsitilishiche, aqsuda aka-uka qérindash bolushqan xitay yen jyenbo bilen Uyghur muxtar rosul birlikte ashxana achqandin kéyin béyish yoligha qarap mangghan iken. Uyghurlarning "Halal" ghizalinishtin ibaret asasiy turmush usulini nezerde tutqanda bu atalmish "Milletler ittipaqliqi ashxanisi" da qandaq yémeklikler sétilidighanliqi közetküchilerning diqqitini qozghidi.

"Tengritagh tori" da élan qilin'ghan yene bir parche xewerde bolsa xubéy ölkisidin yeken'ge ishligili kelgen sung chi bilen rén senmawning shu yerdiki nurmemet bilen qoshna bolup qalghanliqi, bu ikkiylenning yol körsitishi we yardem qilishi bilen nurmemetning éshek süti sodisini bashlap künde 700 yüendin artuq kirim qilidighan halliq kishige aylan'ghanliqidek hékaye bayan qilin'ghan.

Halbuki, chet'ellerdiki kishilik hoquq organliri xitay hökümiti teripidin mejburiy yosunda yürgüzülüwatqan atalmish "Qoshmaq tughqanchiliq" siyasitining meqsitini yerlik xelqlerning xususiy hayatini 24 sa'et boyiche nazaret qilish, dep qarimaqta. Ular yene buni insan hayatining xususiy mexpiyetlikige qilin'ghan éghir derijidiki dexli-teruz, dep tenqid qilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet