Қумул көмүр кан ишчилири иш һәққини өстүрүшни тәләп қилип намайиш қилди

2 - Ноябир күни қумулдики сәндавлиң көмүр кени йәни йәрликләр таранчи көмүр кени дәп атайдиған көмүр кан ишчилиридин 7 - 8 миң нәпәр ишчи, иш һәққини өстүрүп беришни тәләп қилип намайиш қилған. Радийомиз хитай бөлүми игилигән әһваллардин мәлум болушичә, 2 - ноябирдики намайишни һөкүмәт сақчиларни әвәтип тарқитивәткәндин кейин, көмүр кан ширкәт даирилири вәзийәтни контрол қилиш тәдбирлири һәққидә җиддий йиғин ачқан. Ишчиларниң наразилиқ намайиши 3 - ноябир сәйшәнбә күниму давамлашқан болуп, намайишни давамлаштурған 100 нәччә ишчи билән вәзийәтни контрол қилишқа әвәтилгән сақчилар арисида тоқунуш йүз бәргән.

Кан районидин радийомиз зияритини қобул қилған ишчиларниң билдүрүшичә, 90 - йиллардин кейин кан ишчилириниң мааши өстүрүлмигән. Мал баһаси өсүп кәткән шараитта ишчилар 1000 сомдин 2000 сомға қәдәр болған маашқа тайинип күндилик турмушини қамдаш вә давалиништа қийналған. Бундақ әһвалда кан даирилириниң өткән һәптә уқтуруш чиқирип, ишчиларниң йиллиқ мукапатиниң бикар қилинғанлиқини уқтуруши ишчиларниң ғәзипини қозғап, 7000 дин артуқ ишчиниң наразилиқ намайишиға сәвәб болған.

Хитай һөкүмити тәрипидин сәндавлиң көмүр кени дәп нам берилгән бу көмүр кан, қумул ваңлиридин ша мәхсут дәвридила мәвҗут болуп, йәрлик уйғурлар арисида бу көмүр канни“таранчи көмүр кени” дәп аташ омумлашқан. Өткән әсирниң 50 - 60 - йиллири бу канда ишләйдиған ишчилар арисида йәрлик уйғурлар мутләқ көпчиликни игиләйдиған болсиму, әмма 90 - йиллардин кейин канға асасән хитай көчмәнлири ишқа елинип, нөвәттә бу көмүркан қумулдики хитай көчмәнлири топлашқан җайларниң биригә айланған.