Uyghur balilirini xitay tili we medeniyiti bilen terbiyeligen qurban niyaz “Memliketlik exlaq nemunichisi” bolup tallan'ghan

Muxbirimiz irade
2019.09.05

5-Séntebir küni, shinxu'a agéntliqi “7-Nöwetlik memliketlik exlaq nemunichiliri” ning tizimlikini élan qilghan. Jem'iy 58 neperdin terkib tapqan bu “Memliketlik exlaq nemunichiliri” arisidiki birdin-bir Uyghur wekil Uyghur balilirini xitay tili we medeniyiti bilen terbiyeligen qurban niyaz bolghan.

Uyghur nopusi mutleq üstünlükni igileydighan uchturpan nahiyesining imamlirim yézisida shexsiy xirajiti bilen “Dölet tili mektipi” achqan qurban niyaz 2018-yilidin bashlap xitay hökümitining taratqulirida birdinla kökke kötürülgen shexske aylan'ghanidi. 

U hetta shu yili xitay kompartiyesi merkiziy komitéti teshkilligen “Islahat we échiwétishning qiriq yilliq musapisige körünerlik töhpe qoshqan 100 nemunichi” ning biri bolghan. Xitayning iqtisadiy qurulush, tebi'iy pen, medeniyet-sen'et, tenheriket saheliridiki ma yün, yaw ming, lang ping qatarliq bir türküm serxiller qatarida Uyghurlargha wekil bolup tallan'ghan birdin-bir kishining Uyghur balilirigha xitay tili ögitish bilenla qalmay, ularni yene mektep hoylisigha sélin'ghan kungzi heykilige tezim qilishqa salghan qurban niyazning bolushi Uyghurlarning küchlük diqqitini qozghidi. Uyghurlargha xitay medeniyitini singdürüsh ülgisi qurban niyaz 2 milyondek Uyghur, qazaq qatarliq xelqlerning wekilliri lagérlargha qamalghan shuningdek Uyghurlarning tebi'iy pen yaki ijtima'iy pen saheliridiki minglighan serxilliri yighiwélish lagérlirigha qamalghan hem ularning arisida obzorchi yalqun rozi, shinjang uniwérsitétining sabiq mudiri tashpolat téyip, shinjang méditsina uniwérsitétining sabiq mudiri xalmurat ghopur qatarliqlar éghir türme jazalirigha mehkum qilin'ghan ehwalda xitay boyiche “Exlaq nemunichisi” bolup bahalandi. 

Téxi yéqinda élan qilin'ghan we xitayda tunji qétim tarqitilidighan “Jumhuriyet ordéni” we “Jumhuriyet sherep nami” namzatlirining tizimlikidimu gheyret mamut isimlik bir neper Uyghur orun alghan. Diqqet qozghaydighini shuki, xitayning qurulushi we tereqqiyati üchün körünerlik töhpe qoshqanlarni teqdirleshni meqset qilghanliqi eskertilgen bu mukapatning namzatliri arisida bir neper Uyghur yeni 2016-yili guma nahiyiside yüz bergen bomba partlash weqeside hayatidin ayrilghan, eyni chaghdiki guma nahiyelik saqchi idarisining sabiq mu'awin bashliqi gheyret mamut orun alghanidi. Radi'omiz eyni chaghda igiligen uchurlarda gumaning köktérek yéza 23-kentide yüz bergen shu künki weqede gheyret mamutning idaridiki bir xitay saqchi ishqa kelmigenliki üchün a'ile tekshürüshige chiqqanliqi we tuyuqsiz bayqalghan bir gumanliq weqeni tekshürüsh üchün bir öyning gemisige chüshkende bomba partlap kétip neq meydanda ölgenliki ashkarilan'ghanidi. Yuqiriqidek mukapatlargha talliniwatqan xitaylar bilen Uyghurlar arisidiki roshen sélishturma közetküchilerning diqqitini qozghimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.