Xitay xelq géziti “Qurban tulum” ni dorighan shexsni 5-iyul küni ésige aldi

Xitay xelq gézitining in'glizche sehipisi 5-iyul küni mexsus halda Uyghur élida 70-yillarda maw zédungni körüsh üchün éshek minip yolgha chiqqan qurban tulumni dorap, béyjinggha piyade seperge chiqqan ablajan muxtarni alahide xewer qilip tarqatti.

Xewerde éytilishiche, 43 yashliq ablajan muxtar aptomobil rimontchiliqi bilen shughullinidighan bolup, u qurban tulum rohini özige ülge qilip, Uyghurlarning méhmandostluqini, keng qosaqliqini we milletler ittipaqliqini söyidighan iradisini namayan qilish üchün béyjinggha piyade yolgha chiqqan imish.

Emma diqqet qozghaydighini, ablajan isimlik kishi béyjinggha piyade méngish herikitini aprélning béshida bashlighan bolsimu, u xitaydiki axbaratlarda tilgha élinipmu qoymighan. Emma del 2009-yilidiki 5-iyul ürümchi weqesining 8 yilliq xatire künide bolsa, xitay hökümet awazi hésablinidighan xelq géziti in'glizche sehipiside uni teshwiq qilghan.

Chet'ellerdiki Uyghur közetküchiler bolsa xitay axbaratlirining bundaq pursetperes shexslerni qollinish arqiliq Uyghurlargha yürgüzüwatqan qattiq qolluq siyasitini we Uyghurlarning xitay hökümitige bolghan naraziliqini yoshuralmaydighanliqini bildürmekte.

Xitay hökümiti yéqinqi yillardin buyan, alliqachan untulup ketken qurban tulum teshwiqatini qaytidin sörep chiqip, uni partiyidin minnetdar bolushning, qoshmaq tughqandarchiliqning ülgisi qilip körsetmekte.